Өмнөд Африкийн Бүгд Найрамдах Улсын хамгийн нөлөө бүхий омгийн тэргүүн өөрийг нь хордуулсан байж болзошгүй гэсэн сэжгийн улмаас эмнэлэгт эмчлүүлж эхэлсэн тухай хэвлэлийн төлөөлөгч нь Ням гарагт мэдээлжээ.

48 настай Мисузулу Зулу өнгөрсөн онд эцэг Гүүдвилл Звелитиниг нас барсны дараа залгамжлагчдын ширүүн өрсөлдөөнд ялж, Зулу омгийн хаан ширээнд суусан юм.

Түүний шадар зөвлөх нь Бямба гарагт гэнэт нас барсан юм байна. Хөрш Эсватини улсад айлчилж байсан хаан үүний дараа хэн нэгэн өөрийг нь хордуулсан байж болзошгүй хэмээн сэжиглэж, эмчийн хяналтад орж, шинжилгээ оношилгоонд хамрагдаж эхэлжээ.

Хэдийгээр гадуур хаан өвдсөн гэх цуурхал тарсан ч биеийн байдал нь маш сайн байгааг хэвлэлийн төлөөлөгч нь өчигдөр мэдэгдсэн байна.

Гүйцэтгэх засаглалын эрх мэдэлгүй ч Өмнөд Африкийн Бүгд Найрамдах Улсын 60 сая хүн амын доторх Зулу омгийн 11 сая иргэний хувьд хаан нь бэлгэдлийн асар их нөлөөтэй байдаг.

Өнгөрсөн онд нас барсан хаан Звелитини омог аймгаа 50 гаруй жил удирдсан юм. Тэрбээр зургаан эхнэр, 28 хүүхэдтэй хүн байжээ.

Одоогийн хаан Мисузулу нь түүний гурав дахь эхнэрийн ууган хүү юм.

Талийгаач хаан гэрээслэлдээ Мисузулуг залгамжлагчаараа зарласан ч бусад хүүхдүүд нь хаан ширээний төлөө ширүүн тэмцэлдэж байв.

Эх сурвалж: AFP