1940 онд Польшийн язгууртны гэрээс Германы нацистуудын дээрэмдсэн сэргэн мандалтын үеийн ховор уран зургийг саяхан Япон улсаас олжээ.

Итали зураач Алессандро Туркигийн “Хүүхэдтэй Мадонна” нэртэй энэ бүтээл ямар замаар Японд ирсэн нь тодорхойгүй юм байна.

Уг бүтээлийг Японы засгийн газар өнгөрсөн сарын сүүлээр Токио дахь Польш улсын элчин сайдын яаманд ямар нэг үнэ төлбөргүйгээр хүлээлгэн өгчээ.

Энэ нь дэлхийн хоёрдугаар дайны үед Польшоос алдагдсан урлагийн бүтээл анх удаа Алс Дорнодын бүс нутгаас олдсон тохиолдол болохыг элчин сайдын яам баталсан байна.

1990-ээд оны үед Нью-Йорк хотын дуудлага худалдаанд үзэгдсэнээсээ хойш уг бүтээл сураггүй алга болж байжээ.

Харин 2021 оны намар нэг хүн зургийг 3 сая иенээс эхлэн үнэ хаялцуулж зарахаар Токио хотын Маиничи Аукцион компанид хандсан юм байна.

Зургийг зарахаасаа өмнө тус компани 2022 оны нэгдүгээр сард Польшийн элчин сайдын яамтай холбогдож, мэдээлэл өгч байжээ.

Улмаар Польшоос Японд ирсэн судлаачид зургийг шалгаад 1940 онд алдагдсан бүтээл мөн болохыг баталсан байна.

Японы эзэмшигчтэй нь буцааж өгөхөөр тохиролцож чадсан Маиничи Аукцион компанийн төлөөлөгч Ёшиаки Онояама “Хүүхэдтэй Мадонна бүтээл дахин Польшийн ард түмний эзэмшилд очлоо. Ингэснээр санхүүгийн хувьд ямар ч ашиг гараагүй, гэхдээ бид үүргээ гүйцэтгэсэн гэж бодож байна” гэж ярьжээ.

Эх сурвалж: Kyodo News