ТОКИО. /NHK/. Олон улсын атомын эрчим хүчний агентлагийн /ОУАЭХА/ тэргүүн Рафаэль Гросси “Фүкүшима Дайичи” атомын цахилгаан станцын /АЦС/ цэвэрлэсэн усыг далайд асгах төлөвлөгөөний талаар хэлэлцэхээр Японд ирэх долоо хоногт айлчилна.

Японы Гадаад хэргийн сайд Хаяши Ёшимасагийн мэдээлснээр, ОУАЭХА-ийн тэргүүний Японд хийх дөрвөн өдрийн айлчлал ирэх мягмар гарагт эхэлнэ. Тэрбээр Х.Ёшимаса тэргүүтэй төлөөлөгчидтэй уулзах бөгөөд “Фүкүшима Дайичи” станцад очих ажээ.

Х.Ёшимаса Р.Гросситой АЦС-ын цэвэрлэсэн усыг далайд асгах зэрэг янз бүрийн асуудлаар санал солилцоно гэдгээ мэдээлсэн байна. Тэрбээр мөн Засгийн газар ОУАЭХА-ийн тайлан зэрэг бусад бичиг баримтад тулгуурласан ирээдүйд хэрэгжүүлэх төлөвлөгөөний талаар хэлэлцэнэ гэж найдаж байгааг илэрхийлжээ.

Засгийн газрын эх сурвалжуудын мэдээлснээр, Р.Гроссигийн айлчлалын эхний өдөр Ерөнхий сайд Кишида Фүмиотой хийх уулзалтыг төлөвлөж байгаа аж. Тэдний хэлснээр, К.Фүмио цэвэрлэсэн усыг далайд асгах төлөвлөгөөний аюулгүй байдлын талаар ОУАЭХА-ийн тайланг хүлээн авах төлөвтэй байна. 

Хайлсан цөмийн түлшийг хөргөхөд ашигладаг ус нь “Фүкүшима Дайичи” АЦС-ын савнуудад хуримтлагдаж байгаа юм. Уснаас ихэнх цацраг идэвхт бодисыг шүүж цэвэрлэсэн ч тритий агуулагдсан хэвээр байгаа аж.

Засгийн газар цэвэрлэсэн усыг энэ зунаас далайд асгаж эхлэхээр төлөвлөж байгаагаа мэдэгдээд буй. Гэхдээ цэвэрлэсэн усан дахь тритийн агууламжийг ДЭМБ-ын тогтоосон ундны усны зөвшөөрөгдөх хэмжээний долооны нэгтэй тэнцэх хэмжээнд шингэрүүлэх шаардлагатай байна.  

Эх сурвалж: "Монцамэ" агентлаг