Энэ долоо хоногт Шинэ Зеландын ерөнхий сайд Крис Хипкинс экспортын хэмжээгээ нэмэгдүүлэх зорилготой Хятад улсад айлчилж байна.

Ингэхдээ тэр ерөнхий сайдын тусгай үүргийн нисэх онгоцноос гадна нөөц бас нэг онгоцтой явсан нь сөрөг хүчний шүүмжлэлийн бай болжээ.

Нөөц онгоц нь үндсэн онгоц эвдэрсэн тохиолдолд ашиглагдах юм байна.

Ингэх болсон нь учир шалтгаантай. Шинэ Зеландын удирдагчдын гадаад айлчлалдаа ашигладаг Boeing 757-200 нисэх онгоц нь 30 жилийн өмнө үйлдвэрлэгдсэн, 2028-2030 оны үед ашиглалтаас гарах хуваарьтай юм байна. Уг онгоц өнгөрсөн хугацаанд хэд хэдэн удаа эвдэрч, зорчигчдоо эвгүй байдалд оруулж байжээ.

2016 онд тухайн үеийн Шинэ Зеландын ерөнхий сайд Жон Ки онгоц нь гэмтэж, Австралид саатсаны улмаас Энэтхэг улсад хийсэн айлчлалаа богиносгож байв.

Үүнээс хойш гурван жилийн дараа эх орондоо буцаж явсан ерөнхий сайд Жасинда Ардерн онгоц нь эвдэрсэн тул Австралийн Мельбурн хотоос нийтийн тээврийн онгоцонд шилжин сууж байжээ.

Энэ удаа ижил загварын, ижил элэгдэлтэй нөөц онгоцыг болзошгүй гэмтлийн үед ашиглахаар Филиппиний нийслэл Манила хотод урьдчилан байршуулсан юм байна.

“Уур амьсгалын өөрчлөлттэй тэмцэж буй энэ цаг үед хоосон онгоц давхар нисгэх нь зөв шийдэл гэж би бодохгүй байна” гэж Шинэ Зеландын сөрөг хүчний Үндэсний Намын дарга Крис Луксон ерөнхий сайдынхаа айлчлалыг шүүмжилжээ.

Өөр нэг намын удирдагч Дэвид Сэймур “Нэмэлт онгоцны ялгаруулах хүлэмжийн хийн хэмжээ Ford Ranger автомашинаар сар руу гурван удаа аялахтай дүйцнэ” гэж Фэйсбүүк хуудсандаа бичсэн байна.

“Айлчлалын ач холбогдол, туулах зай, бизнесийн болон хэвлэл мэдээллийн төлөөллийн бүрэлдэхүүний хэмжээ зэргийг харгалзан үзээд манай хамгийн том худалдааны түнш улсад хийх айлчлалыг амжилттай байлгах үүднээс нэмэлт нисэх онгоц ашиглахаар болсон юм” гэж Шинэ Зеландын ерөнхий сайдын хэвлэлийн алба тайлбарлажээ.

Эх сурвалж: CNN