Украинд олзлогдсон Оросын хуягт тэргийг судлахаар шилжүүлж авснаа Их Британийн батлан хамгаалах яамны мэргэжилтэн саяхан Sky News сувагт ярьжээ.

Одоо тус улсын зохион бүтээгчид уг техник хэрхэн ажилладгийг ойлгохоор “задлан шинжилж” байгаа тухай адмирал Сэр Тони Радакин ярьсан байна.

“Бид үүнийг хэрхэн цохих вэ? Илүү сайн хуяг хэрхэн бүтээх вэ? Харилцаа холбооны системийг нь яаж таслах вэ?” зэрэг асуултуудын хариултыг олохоор ажиллаж буйг тэр мэдээлжээ.

Ирээдүйд Их Британийн болон бусад холбоотнуудын үндэсний аюулгүй байдалд дайсагнаж болзошгүй ийм техник дэлхийн хэд хэдэн орны зэвсэглэлд байдаг тул нарийвчлан судлах нь өндөр ач холбогдолтойг Радакин тайлбарласан байна.

Украины дайн Орос болон Өрнөдийн орнуудын хувьд харилцан нэгнийхээ зэвсэг техникийн чадлыг сорих, мэдээлэл авах боломжийг бүрдүүлж байгаа.

Тухайлбал өнгөрсөн онд Украины арми Оросын хамгийн сүүлийн үеийн Т-90M танкийг олзолж авснаар НАТО-гийн орнууд энэхүү байлдааны техникийн талаар дэлгэрэнгүй мэдээлэл авах боломжтой болсон гэдэг.

Оросын тал ч бас Германы танкуудыг олзолж авснаа судалж буйг харуулсан дүрс бичлэгийг цацаж байв.

Их Британийн батлан хамгаалахын сайд Бэн Уоллос бас саяхан хэвлэлд ярихдаа Украины дайнаас авсан сургамж дээрээ үндэслэн батлан хамгаалах стратегиа шинэчилж буйг өгүүлсэн байна.

Украин улс “ингэж хэлэхэд харамсалтай ч дайны технологийн лаборатори” болж буйг тэр BBC сувагт ярьжээ.

Эх сурвалж: Business Insider