Франц улсын эрх баригчид хог хаягдлыг бууруулах зорилтынхоо хүрээнд хуучин хувцсаа засварлаж өмсөхийг дэмжсэн хөтөлбөр хэрэгжүүлэхээр болжээ.

Жил бүр тус улсын иргэд 700,000 тонн хуучин хувцас хаядгийн гуравны хоёр нь шууд хогийн цэгт шилждэг байна.

Харин энэ оны аравдугаар сараас эхлэн иргэд хуучин хувцсаа засварлаж өмсөхөд гаргасан зардлынхаа тодорхой хэсгийг засгийн газраас нэхэмжилж байхаар болжээ.

Уг татаасын хэмжээ 6-25 евро байх юм байна.

Саяхан Парис хотын нэг хувцас загварын төвд зочлохдоо Францын экологийн сайд Беранжер Куллярд уг хөтөлбөрийг зарлажээ.

Засгийн газар энэхүү хөтөлбөрийг ирэх таван жилийн хугацаанд санхүүжүүлэхэд зориулан 154 сая еврогийн сан байгуулсныг тэр мэдээлсэн байна.

Хөтөлбөрийг Refashion нэртэй байгууллага гардан хэрэгжүүлэх гэнэ.

Оёдлын цехүүд, гутал үйлдвэрлэгчдийг шинэ хөтөлбөрт хамрагдахыг сайд уриалсан байна.

Refashion байгууллага зөвхөн хуучин хувцсаа дахин өмсөхөд иргэдийг уриалах биш, бас хуучин хувцас худалдаж авах, бусдад хандивлахыг хөхүүлэн дэмжих юм.

Тус байгууллага хандивын хуучин хувцасны 56 хувийг дахин ашиглах, 32 хувийг дахин боловсруулж шинэ хувцас болгох зорилготой юм байна.

Дэлхий даяар жил бүр 100 гаруй тэрбум ширхэг хувцас борлогддог гэсэн тоо бий. Франц улсын хувьд жил бүр дунджаар нэг хүнд 10.5 кг шинэ хувцас оногддог байна.

Сүүлийн жилүүдэд Франц улс байгаль дэлхийд ээлтэй, хэмнэлттэй хэрэглээг дэмжсэн бодлого эрчимтэй хэрэгжүүлж байгаа.

2016 онд тус улсын супермаркетуудад хуучирсан хүнсний бараа бүтээгдэхүүнийг устгахыг хориглож, оронд нь хандивлах журам хэрэгжиж эхэлсэн.

Энэ оноос эхлэн нэг удаагийн аяга таваг, хоолны хэрэгсэл ашиглахыг түргэн хоолны газрууд болон 20-оос дээш суудалтай ресторануудад хориглож эхэлжээ.

Эх сурвалж: The Guardian