БНХАУ-ын Цинхай муж буюу Төвөдийн автономит улсын Хайбейд оршдог нүүрсний уурхайд өчигдөр хөрсний нуралт үүсэж, олон хүн дарагдсан харамсалтай хэрэг гарчээ. Ослын улмаас өчигдрийн байдлаар нэг хүн нас барж, 19 хүн дарагдсан гэсэн мэдээтэй байв. Эх сурвалжийн мэдээлснээр, энэхүү ослын дараа төрөөс нийт уурхайн аюулгүй ажиллагааг шалгахаар болсон бөгөөд үүнтэй холбоотойгоор олборлолт буурах магадлалтай юм байна. Энэ хугацаанд эрэлт хэвээр байх тул дутагдах нүүрсийг ОХУ, Монголоос авах импортыг нэмэгдүүлэх замаар шийдэх боломжтой хэмээн уг нийтлэлд бичсэн байв.

Цахилгаан станцуудын эрэлт их, олборлолт, импорт цар тахлын нөхцөл байдлаас болоод бага байгаа тул өнгөрсөн долдугаар сараас хойш нүүрсний үнэ БНХАУ-ын дотоодод 10 орчим хувиар өсжээ.   

Импорт хэр хэмжээгээр өсөхийг яг таг хэлэх боломжгүй ч осол гарсан уурхай гэхэд жилд 900 000 тонн нүүрс олборлодог гэнэ.

Австрали улстай харилцаа хүйтэрсний улмаас БНХАУ нүүрсний шинэ нийлүүлэгчийн эрэлд гарсан бөгөөд энэ нь ОХУ, Монгол зэрэг нүүрс экспортлогч орнуудад сайхан боломжийг нээсэн юм. БНХАУ өнгөрсөн сард 30.18 сая тонн нүүрс импортолсон нь өнгөрсөн оны мөн үеийнхээс 15 хувиар илүү байгаа юм.