Засмал замын дугуйн Ази тивийн аварга шалгаруулах тэмцээн Тажикистаны нийслэл Душанбе хотноо өнөөдөр элит эмэгтэй, элит эрэгтэй бөөн гараат уралдаануудаар өндөрлөнө. Манай ОУХМ Ц. Солонго уралдах элит эмэгтэй, Under-23 эмэгтэй ангиллын бөөн гараат 111 км-ийн тэмцээн Улаанбаатарын цагаар 11:00 цагаас эхлэнэ. Энэ гараанд 12 улсын 40 тамирчид оролцохоор болжээ. Харин элит эрэгтэй ангиллын бөөн гараат 175 км-ийн тэмцээн Улаанбаатарын цагаар 14:45 цагаас эхлэх бөгөөд манай багаас ОУХМ С.Жамбалжамц, ОУХМ Б.Марал-Эрдэнэ, ОУХМ Б.Мягмарсүрэн, ОУХМ Э.Билгүүнжаргал нар эх орноо төлөөлөн хурд хүчээ сорино. Энэ ангилалд нийт 12 улсын 41 тамирчид өрсөлдөх юм. Монголын баг тамирчид одоогоор тус тэмцээний насанд хүрэгчдийн ангиллаас нэг мөнгө, нэг хүрэл, залуучуудын ангиллаас нэг хүрэл медаль хүртээд байгаа. Тажикистаны тэнгэрт Монголын далбаа дахин дахин мандах болтугай!