Цар тахлын дараа аялал жуулчлалын салбарыг сэргээж эргээд хэвийн байдалд оруулах чиглэлээр Монгол Улсын Засгийн газраас анхаарч тусгайлсан бодлого, арга хэмжээг хэрэгжүүлж байна. 2023-2025 оныг “Монголд зочлох жил” болгон зарлаж, идэвхтэй ажилсны үр дүнд 650 гаруй мянган жуулчин хүлээн авсан үзүүлэлттэй байгааг та бүхэн мэдэж байгаа. Хэдийгээр 2019 оны жуулчдын тооны үзүүлэлтийг давсан хэдий ч Монгол орны газарзүйн байрлал, байгаль цаг уурын онцлогоос хамаараад жилийн тодорхой хугацаанд буюу өвлийн улиралд ирэх жуулчдын урсгал буурдаг.

БОАЖЯ-аас улирлын хамаарлыг бууруулах, өвлийн улирлыг уртасгах, жуулчдын урсгалыг нэмэгдүүлэх чиглэлд тодорхой арга хэмжээнүүдийг хэрэгжүүлж эхлээд байна.  Тухайлбал “Мазаалай” олон улсын цас мөсний наадмыг зохион байгуулах, цас мөсөн хотхон байгуулж Монголын ирээдүйн хамгийн том өвлийн аялал жуулчлалын бүтээгдэхүүн бий болгох, дэлхийн хамгийн олон хүн гулгах мөсөн гулсуурыг бүтээж, Гиннесийн амжилт тогтоохоор байгууллага, уран бүтээлчидтэйгээ хамтран ажиллаж байна.

Цас, мөсөн цогцолбор байгуулж жуулчдын урсгалыг татаж буй олон жишээ байна. Ж: Харбины мөсөн цогцолбор. Мөн олон улсын цас мөсөн уралалын тэмцээнүүдэд монголын уран бүтээлчид үргэлж дээгүүр байр эзлэсэн амжилттай байгаа. Эх орондоо бүтээлээ хийж, эх орныхоо болон уран бүтээлчдийнхээ нэрийг гаргах нөхцөл бололцоог бүрдүүлж байгаагаараа онцлогтой юм. Гиннесийн амжилт тогтоох бүтээл нь нэг дор 200 хүн гулгах боломжийг бий болгох мөсөн гулсуурыг уран бүтээлчид бий болгож байгаа юм.

Мазаалай мөсөн цогцолборыг бий болгосноор дотоодын амрагч иргэд, жуулчид өвлийн амралтаараа гэр бүл, үр хүүхдүүдтэйгээ цагийг зөв боловсон, сонирхолтой өнгөрүүлэх, цаашид жил бүр хийж, тогтмолжуулснаар гадаадын жуулчид өвлийн улирлыг Монгол улсад л мэдрэх боломжийг бүрдүүлэх, уран бүтээлчдээ дэмжих арга хэмжээ болгон өргөжүүлнэ.

Мазаалай мөсөн хотхоны нээлтийг 01 дүгээрсарын 14-ний өдөр хийх бөгөөд олон төрлийн урлаг, соёлын арга хэмжээг зохион байгуулагдахаас гадна иргэдийн аюулгүй байдал, байгаль орчныг бохирдуулахгүй байх талаас бүрэн анхаарч ажиллах болно.