Иргэн С.Мөнхбат эмч Б.Дугархүүгийн зардаг NMN гэх бүтээгдэхүүн, УИХ-ын гишүүн М.Нарантуяагийн зардаг байсан түрүү булчирхайн бэлдмэл, дуучин В.Баттулгын борлуулдаг эрчүүдийн кофе зэрэг бүтээгдэхүүний талаар шүгэл үлээсэн. Ингэхдээ тухайн инфлүүсерүүд үр дүнг нь хэтрүүлэн худал тайлбарлаж, үнийг нь бодит ханшнаас 10-20 дахин нугалж зарсан гэх мэт асуудлыг сөхөж, өөрийн цуглуулсан баримтуудаа цахим хуудсаараа дэлгэсэн. Уг үйлдлийнхээ хариуд түүнийг М. Нарантуяа сошиал орчинд ёс бус үгээр хэлүүлж, Б.Дугархүү хоёр хүүхдийнх нь дансыг хаалгах хэмжээнд хүртэл эсэргүүцжээ. 

Гадаадад амьдардаг С.Мөнхбат ойрын өдрүүдэд Монголдоо ирж, дээрх үйлдлүүдийнхээ талаар мэдээлэл хийж байна. Эдгээрийг хөндлөнгөөс харахад иргэд хоорондын маргаан, бусдын бизнесийг харлуулсан үйлдэл мэт боловч, нидэр дээрээ энэ иргэний яриад хэлээд байгаа тухайн бүтээгдэхүүнийг бүгдийг нь монголчууд аваад "идээд, уучихсан"-д учир байгаа юм. Инфлүүсер гэдэг нь цахим орчинд олон дагагчтай, өөрийн контент болон үзэл бодлоороо бусдад нөлөөлдөг хүнийг хэлдэг. Гэвч хүний эрүүл мэндтэй холбоотой асуудалд С.Мөнхбатын хэлсэнчлэн хайнга хандсан бол энэ бол асуудал юм. Тэгэхээр иргэд инфлүүсерийг дагаж, таашааж болох энэ мэт эрүүл мэндийн бүтээгдэхүүнийг хэрэглэхдээ хэрсүү хандаж, сурмаар байна.  

Өнөөдөр ямар ч бүтээгдэхүүнийг зургаар, нэрээр, оновчтой түлхүүр үгсээр хайлт хийхэд хүссэн хэл дээрээ мэдээлэл авах боломжтой болчихсон цаг үед бид амьдарч байгаа. Гэтэл зөвхөн нөлөөлөгч хүний уран цэцэн үгс, тоочсон олон үр дүн, дээрээс нь урамшуулалт худалдаа зэрэгт автаж, "юу  нь мэдэгдэхгүй юм" амаараа оруулж байгаа нь үнэхээр хариуцлагагүй сонголт юм.