Монгол улсын Замын хөдөлгөөний дүрэмд өөрчлөлт оруулах асуудлыг Засгийн газрын хуралдаанаар хэлэлцүүлэхээр шийдвэрлэжээ. Энэ талаар УИХ-ын гишүүн Р.Сэддорж "Малаа дайруулсан малчид бурууддаг, өр төлбөрт унадаг харгис дүрэм өөрчлөгдөж, нүүдэлчин малчдын талд шийдэгдэнэ гэдэгт итгэж байна" хэмээн мэдээллээ. 

Монгол Улсын Замын хөдөлгөөний дүрмийн 23-ын 7 дахь хэсэгт зааснаар “Суурин газрын гаднах засмал замаар мал туухдаа зорчих хэсгийн дагуу явна. Засмал замаас 50 метрийн дотогш хариулгагүй мал байлгахыг хориглоно” хэмээн заасан байдаг. Түүнчлэн “Малыг гүүр болон гарцаар гарахдаа аль болох түргэн, бөөнөөр нь туух бөгөөд энэ үед ойртон ирж буй тээврийн хэрэгсэлд зам тавьж өгнө” гэх хуулийн заалттай.