Дэлхийн хамгийн баян гэр бүлийн гишүүн, Энэтхэгийн ДНБ-ий 3.5 хувийг дангаараа үйлдвэрлэдэг, улсдаа хамгийн томд тооцогддог Мумбайн хөрөнгийн биржийн арилжааны ихэнх хэсгийг бүрдүүлдэг Reliance Industries-ийн хяналтын (48%) багцыг эзэмшигч, эцэст нь дэлхийн 10 дахь баян хүн. Энэ бол эдийн засагчдын дунд “Алтан толгой” хэмээн хүндлэгдсэн тэрбумтан Мукеш Амбани юм. Тэрбээр бизнесээ 0-ээс эхлээгүй ч эцгийн буй болгосон суурь хөрөнгийг хэд дахин үржүүлсэн ухаантай хүү билээ.

Мукеш Амбани 1957 оны дөрөвдүгээр сарын 19-нд Йеменд Ази тивдээ хамгийн томд тооцогдох химийн үйлдвэр Reliance Industries-ийг үүсгэн байгуулагч, Дхирубхай Амбанигийн ууган хүү болон төрсөн юм. Мукешийг төрөх үед эцэг нь бага гарын бизнесмэн байсан ч хожим Энэтхэгийн аж үйлдвэрийн домгуудын нэг болтлоо өсөн дэвжжээ.

Мукешийг Мумбайн Химийн технологийн их сургуульд Химийн хавсарга шинжлэх ухааны чиглэлээр бакалаврын зэрэг хамгаалж, Стэнфордын Их сургуулийн бизнесийн факультетэд суралцах үед Дхирубхай Амбанигийн бие гэнэт муудсан тул 1981 онд эх орондоо ирсэн байна. Энэ цаг мөчөөс хойш ажил хэрэгт бүх цагаа зориулж иржээ. Тэрбээр компанийн удирдлагыг гартаа авснаас хойш Reliance Industries-д 60 өндөр технологийн үйлдвэрийг шинээр байгуулж эдийн засгийн хүчин чадлыг нь 12 дахин өсгөсөн гэдэг. Мукеш Жамнагарт дэлхийд томд тооцогдох нефть олборлох үйлдвэрийг өөрийн гараар цогцлоосны дээр эдүгээ Энэтхэгтээ хамгийн хүчирхэгт тооцогдож буй мэдээллийн “Reliance Communications”-ыг үүсгэн байгуулсан юм. Гэр бүлийн гишүүддээ бизнесээ хуваасны дараа “Reliance Communications” нь түүний дүү Анил Амбанигийн эзэмшилд очжээ.

Эхнэр Нита, охин Иши нарын хамт.

Мукеш Амбанигийн гэргий Нита хүмүүнлэгийн томоохон зүтгэлтэн бөгөөд тэд гурван хүүхэдтэй. 2007 онд Энэтхэгийн хэвлэлүүд түүний хөрөнгийг 63.2 тэрбум ам.доллараар үнэлж дэлхийн хамгийн баян хүнээр зарлаж байжээ. Харин “Форбс” сэтгүүлийн хувилбараар бол тухайн онд түүний хөрөнгө 43 тэрбум ам.долларар үнэлэгдэж байв.

Эдийн засгийн хямрал нүүрлэсэн 2008 онд Энэтхэгийн хөрөнгөтнүүд 200 тэрбумын алдагдал хүлээсэн гэсэн тооцоог гаргасан байдаг. Үүний дийлэнх хэсгийг 30.5 тэрбумыг алдсан Лакшми Миттал, хөрөнгөний үнэлгээ нь 58 хувиар буурсан Мукеш Амбани нар тэргүүлж байв.

Олны анхаарлыг өөрөөсөө ямагт хол байлгаж ирсэн тэрбээр дүү Анилтайгаа шүүхдэлцсэнээр хүссэн хүсээгүй хэвлэлийн баатраар тодроод амжсан. Дэлхийн хамгийн баян хүмүүсийн жагсалтад ахынхаа өмнө гишгэх хүсэлдээ хөтлөгдсөн дүү нь хэрэг өдүүлсэн нь тэр аж. Гэвч шүүх даварсан дүүг байранд нь тавьж, ахын эрхийг баталгажуулснаар Мукеш дэлхийн баян хүн хэвээр үлдсэн юм.

Мукешийн гэр.

Тэрбээр тансаг амьдралд ихээхэн дуртай нэгэн бөгөөд гэр бүлийнхээ хэрэгцээнд зориулж 27 давхар харш бариулаад эрх баригчдын зүгээс зэмлэлийн үг сонсч байв. Энэхүү тансаг харшид театраас авахуулаад онгоцны буудал хүртэл байдаг ажээ.   

Цар тахлын жилүүдэд хөрөнгийн үнэлгээгээ өсгөсөн гэдэг үзүүлэлтээр түүнтэй зөвхөн “Амазон”-ы Жефф Безос л өрсөлдөх биз. 2017 онд 23.2 тэрбум ам.доллараар үнэлэгдэж байсан Мукеш Амбанигийн хөрөнгө 2018 онд 40.1, 2019 онд 50 тэрбум, өнгөрсөн жил 36.8 тэрбумаар үнэлэгдэж байсан бол энэ онд 84.5 тэрбум ам.доллар болж “Форбс”-ын жагсаалтын эхний 10-т орж иржээ.