Хүн төрөлхтөн ямар нэгэн тэмдэглэлт баяр ёслол бодож олохдоо гарамгай. Тэр ч утгаараа жилийн 365 хоногийн дурын нэгийг сонгож авлаа ч ямар нэгэн баяр заавал таарна. Тэр бүү хэл хоногийн 24 цагт нэг биш, нэлээд хэдэн баярыг ч тэмдэглэн өнгөрүүлэх боломжтой. Энэ талаар жаахан судлахад л хүн бүр онцгой, улс бүр өөрийн гэсэн түүхтэй гэдгийг мэдрэх шиг болдог.  Жишээ нь, өнөөдөр, зургадугаар сарын 2-нд гэхэд Эрүүл хооллолтын олон улсын өдөр /Хоол хүнс идэхгүй байхаас татгалзах өдөр/, Олон улсын биеэ үнэлэгчдийн өдөр (International Whores Day), Бүгд найрамдах Итали улс байгуулагдсан өдөр, Азербайжан улсын иргэний нисэхийн салбарын өдөр зэрэг баяр тохиож байх жишээтэй. Chig.mn цахим сонины хамт олон бид уншигч та бүхэндээ өнөөдрөөс эхлээд өдөр бүр тухайн өдрийн баяр, тэмдэглэлт өдрүүдийг танилцуулахын хамт бидэнд онцгой сонин санагдах нэгийг нь онцлон танилцуулж байх болно. Дэргэрэнгүй танилцуулах баяраараа өнөөдөр “Шүүгээ унагах өдөр” хэмээх сонин баярыг сонгож авлаа.   

Тавилга хаях аль эртний Ромын үед тэмдэглэж байсан гэсэн баримт бий. Гэрийнхээ цонхоор том эд зүйлсийг гарган хаяж дуу чимээ гаргах нь гэрт хоргодсон сүнснүүдийг зайлуулж, муу муухайг үргээн бүтэн жилийн турш хамгаалдаг гэж үздэг байжээ. Италид бол ийм зан үйл нь хуучин бүхнийг халж, шинэ эхлэл аз жаргалтай байхыг бэлгэддэг төдийгүй, тухайн агшинд сэтгэл санаа ч цэвэршин жаргалтай болох утга агуулдаг байна.

Алга дарам газартаа тэнгэр тулам харшид тухалдаг их хотын иргэдэд энэ баяр зохихгүй ч эдлэн газарт аж төрдөг эрхмүүд туршаад үзэхэд гэмгүй ч юм шиг...    

Бусад баярууд:

-Дэлхийн гүйлтийн өдөр

-Цаасан шувуу, цаасан онгоц хөөргөх олон улсын өдөр

-Хиймэл дагуулын хяналт, навигацийн олон улсын өдөр

-Шүдний эмчээ хайрлах өдөр, АНУ (I Love My Dentist Day)

-Ханборгоцойн баяр, Тайланд

-Грильдэж шарсан тахианы өдөр, АНУ (National Rotisserie Chicken Day)

-Оффисын ажилчид эрт тарах өдөр (National Leave the Office Early Day)

-Төмөр замчдын өдөр, Словен

-Ойн аж ахуйн өдөр, Бутан г.м...