Хуучин нэрээр Твиттер компани Даваа гарагт Сан-Франциско хот дахь байран дээрээ байрлуулсан асар том “Х” гэрэлтдэг тэмдгийг буулгажээ.

Иргэдийн гомдлын дагуу хотын захиргааны шаардлагаар ийнхүү буулгасан юм байна.

Тэрбумтан Илон Маск өндөр үнээр худалдаж авсан Твиттер сошиал платформынхоо брэндийг саяхан өөрчилж, англи хэлний цагаан толгойн 24 дэх үсгээр нэрлэх болсон юм.

Өнгөрсөн долоо хоногийн сүүлээр компанийнхаа байрны дээр асар том анивчдаг “Х” үсгийг байрлуулж байв.

Иргэдийн зарим нь уг тэмдгийн хурц гэрэл шөнө унтаж амрахад нь саад болж буйг гомдоллосон бол зарим нь бэхэлгээ муу, унах эрсдэлтэйг нь шүүмжилжээ.

“X” тэмдэгтэй холбоотой нийт 24 гомдлыг иргэдээс хүлээж авснаа Сан-Франциско хотын барилгын хяналт, хот төлөвлөлтийн алба мэдээлсэн байна.

X Corp компанид оффис түрээслүүлэгч байгууллага тэмдгийг буулгахтай холбоотой бүх зардлыг гаргахаар болжээ.

Илон Маск олонд танигдсан хөх шувууны дүрстэй Твиттерийн бэлгэдлийг өнгөрсөн долоо хоногт “X” үсгээр сольсон юм.

Энэ нь Твиттерийг Хятадын WeChat-тай ижил бүх зориулалтаар ашиглаж болох супер аппликэйшн болгох түүний төлөвлөгөөний нэг хэсэг гэлцдэг.

Өнгөрсөн оны аравдугаар сард $44 тэрбумаар худалдаж авснаасаа хойш Маск уг платформын ашигт ажиллагааг сайжруулах зорилгоор олон шинэчлэлт нэвтрүүлсэн ч үр дүн төдийлөн харагдахгүй байгаа юм.

Эх сурвалж: AFP