Беларусь улсад аялал жуулчлалын салбар аялал, амралт сувиллын бүсэд зохион байгуулалттайгаар амрах /Нарочь, Минскийн тэнгист/, эко буюу агротуризм гэсэн гурван үндсэн чиглэлээр хөгжиж байна.

2015 оны байдлаар аялал жуулчлалын батлагдсан 978 маршрут бүртгэгдсэн байсан бөгөөд үүний 300 нь идэвхтэй ашиглагдаж байв.

“International SOS” агентлаг жуулчдад хамгийн таатай дөрвөн орны тоонд Беларусийг багтааж байсан нь энэ улсад аялал жуулчлал эрчимтэй хөгжиж байгааг илтгэнэ. Төр засгаас ч боломжтой бүх л аргаар дэмжиж буй. Ерөнхийлөгч А.Лукашенко дэлхийн 80 орны жуулчдыг Беларусьт визгүй зорчих боломж олгох тухай журмыг 2017 оны нэгдүгээр сарын 9-ны өдөр гарын үсэг зурж баталгаажуулсан нь үүний жишээ. 2016 онд дөрвөн сая жуулчин хүлээж авсан энэ улс ингэснээр 2017 оны үзүүлэлтээ улам ахиулах нь тодорхой болжээ.  

Беларусьт өнө удаан жилийн түүхтэй, түүхэн уламжлал, хэв шинжээ хадгалж үлдсэн хотууд олон бий. Түүнээс гадна Орос-Туркийн, Орос-Францын, Дэлхийн нэг, хоёрдугаар дайны үед тулалдаан болж байсан, бэхлэлт болж байсан түүхтэй Брест гэх мэт хотууд нь жуулчдын анхаарлыг татдаг. Эрэлт ихтэй байдаг хотууд нь  Брест, Витебск, Гомель, Гродно, Минск, Несвиж, Полоцк. 17-20 дугаар зууны эхэн үед баригдсан архитектурын онцлог шийдэл бүхий барилгууд, эдлэн газар ихтэй. Оросоор “Усадьба” гэж нэрлэдэг ийм цогцолборуудыг байршлын хувьд Гродненская область, Лидский район, «Плещеницы» Минская область, Логойский район гэсэн дөрвөн бүсэд хуваадаг.

Гродненская область

Беларусь нь үнэн алдартны шашны сүм хийдүүдээрээ алдартай. Тэдний дунд Полоцкийн Спасо-Ефросиниевскийн  сүм,  Гэгээн Успенский Жировичскийн сүм хамгийн алдартай нь.

Беларусийн нутаг дэвсгэрт Полацкийн вант улс, Литвын Их Вант Улс, Польш-Литвын Нөхөрлөл зэрэг улсууд оршин тогтнож байсан бөгөөд эдгээр улсуудын түүхэнд холбогдох соёлын өвүүд жуулчдын сонирхлыг зүй ёсоор татдаг. 

Газар нутгийн 40 хувь нь ой модоор хучигдсан, хөдөө аж ахуй, аж үйлдвэрийн салбарууд өндөр хөгжсөн учир эко аялал жуулчлал хийх боломж өндөр.

Беларусьт жуулчдын анхаарлыг хандуулдаг бас нэг зүйл нь уулын спорт, цанын баазууд юм. Якутын уулс, Логойск, Силичи, Альпийн цас мөстэй газруудад цанын баазууд байгуулсан байдаг бөгөөд байгалийн нөхцөлийн хувьд Швейцариас огт дутахгүй.

Харин үйлчилгээ, жуулчдыг татах тал дээр баруун Европын орнуудаас хоцордог. Гэхдээ төр засгийн зүгээс энэ байдалдаа дүгнэлт хийж, жуулчдын анхаарлыг татах, ая тухыг хангах, үйлчилгээг сайжруулах чиглэлээр олон ажил төлөвлөн хэрэгжүүлж байгаа юм байна.

1995 онд явагдсан бүх ард түмний санал асуулгын үр дүнд беларусь, орос гэсэн албан ёсны хоёр хэлтэй болсон учир манай жуулчдад хэлний бэрхшээл харьцангуй бага гарах давуу талтай.

Сүм хийд

Беларусь нь үнэн алдартны шашны эртний уламжлалтай улс орон болохынхоо хувьд шашны холбогдолтой түүхэн дурсгалт газар олонтой. Тус улсын хүн амын 80 хувь нь үнэн алдартны шашин шүтдэг бөгөөд жуулчдын анхаарлыг соронздон татдаг олон газар бий. Тэднээс жуулчид хамгийн их очдог газар нь Спасо Ефросиневскийн гэлэнмаагийн сүм, Гэгээн Успенский, Жировичскийн сүм юм.

Спасо-Ефросиниевскийн гэлэнмаагийн сүм

-Вангийн авхай гэгээн Ефросинья Полоцкой 1125 онд суурийг нь тавьсан, Европтоо маш эртний гэж тооцогдох сүм. Түүхийн урт хугацаанд нэг бус удаа нүүж, олон адармаатай үйл явдлыг үзэж өнгөрүүлсэн уг сүм эдүгээ гадны жуулчид хамгийн их очдог газар болжээ.  

-Гэгээн Успенский Жировичскийн сүм. Гродненскийн хязгаар, Слонимскийн дүүрэгт оршдог. 1587 онд түүхэн сурвалж бичигт тэмдэглэгдсэн байдаг ба эрдэмтэд 16 дугаар зууны үед байгуулагдсан гэж үздэг. 1470, зарим нь 1490 он байгуулагдсан гэсэн яриа ч бий. Сүмийн ансамбль, мөргөлийн сүм гэх зэрэг дөрвөн цогц барилгаас бүрддэг шашны томоохон төв юм. 

Минск

Аливаа улс орны нийслэл хот аялал жуулчлалын хамгийн том төвүүдийн нэг байдаг билээ. Баатар хот Минск жуулчдын анхаарлыг зүй ёсоор татдаг. Ялангуяа 2012 оны арванхоёрдугаар сард Беларусийн аялал жуулчлалын түүхэнд тодоор тэмдэглэгдэн үлдэх үйл явдал болсон нь дэлхийн 29 улс, 100 гаруй хотыг эгнээндээ нэгтгэсэн алдарт “City Tour” Минск хотод нээгдсэн явдал байв. Хоёр давхар улаан автобусаар хот дотор зугаалдаг энэ аялал жуулчдын анхаарлыг маш их татдаг билээ.

Минск хотын аялал жуулчдын анхаарлыг татдаг гол газруудыг дурьдвал:

-Бүх гэгээнтнүүдийн сүм /Оросоор ”Всехсвятская церковь”, англиар All saints church/.

Оросын бүх үнэн алдартны шашинтнуудын тэргүүн, патриарх Алексей  II 1991 онд анх шавыг нь тавьсан. 1996 онд Ерөнхийлөгч А.Лукашенко болон Беларусийн үнэн алдартны шашны тэргүүнүүд хүрэлцэн ирж мөн ёслол үйлдэж байсан. Улмаар 2005 онд албан ёсоор төсөл болж батлагдсанаар 2006 оноос барилгын ажлыг эхлүүлжээ. Сүмийн барилга сүндэрлэж буй, өмнө нь нэргүй байсан гудамжийг ч “Бүх гэгээнтний гудамж” хэмээн нэрлэсэн аж. Барилга нь дуусаагүй ч жуулчдын зайлшгүй очих газрын нэг болж чадсан уран барилга юм.

. –Беларусийн Шинжлэх ухааны академийн Ботаникийн төв цэцэрлэг. Ургамал судлалын чиглэлээр үйл ажиллагаа явуулдаг хамгийн том бааз бөгөөд энд бүх төрлийн судалгаа шинжилгээ, туршилж зэрэг явагдаж байдаг. Нийтдээ 10 000 гаруй нэр төрлийн ургамал ургадаг байна. Жуулчдын маршрутад заавал ордог газар.

-Ялалтын талбай. Минск хот дундуур урсдаг үзэсгэлэнт сайхан Свислочь голын эрэг, Тусгаар тогтнолын өргөн чөлөөнд, Захаровын гудамж, Фрунзегийн гудамжны  хооронд оршдог  Ялалтын талбай нь Мискт хөл тавьсан жуулчдын сонирхлыг хамгийн их татдаг газрын нэг. 1958 оноос “Дугуй талбай” хэмээн нэршиж байсан бөгөөд сүүлд баатар хот болсны дараа алтан таван хошуу байрлуулж, Ялалтын талбай гэж нэрлэх болсон.

-Тусгаар тогтнолын талбай. Минск хотын хамгийн том төв талбай нь. Талбайг тойроод Эрх баригчдын буюу Төрийн ордон, Беларусийн үндэсний их сургууль, Минск зочид буудал, Төв шуудан, Метрополитений төв оффис зэрэг чухал байгууламжууд бий. Товчхондоо нэг оччихсон байхад үзэх харах юм ихтэй газар.