Сөүл хотод зохион байгуулагдсан “W Korea” сэтгүүлийн хөхний хорт хавдрын талаарх мэдлэгийг нэмэгдүүлэх зорилготой “Love Your W 2025” хандивын арга хэмжээ олон нийтийн хүчтэй шүүмжлэлд өртөөд байна.

2006 оноос жил бүр уламжлал болгон зохион байгуулдаг уг үйл ажиллагаа энэ жил Four Seasons Hotel Seoul-д болж, олны танил уран бүтээлчид, загварын ертөнцийн төлөөллүүд өргөнөөр оролцжээ. Гэвч цахим сүлжээнд нийтлэгдсэн зураг, бичлэгүүдэд хөхний хорт хавдрын талаарх уриалга, мэдээлэл бараг харагдахгүй, харин “гала үдэшлэг”, “селебрити шоу” маягаар явагдсан нь олон нийтийн дургүйцлийг төрүүлсэн байна.

Түүнчлэн арга хэмжээний хандивын мөнгө, ашиглалтын ил тод байдалд эргэлзээ үүсчээ. Зарим хэвлэл мэдээллийн хэрэгслээр 2007–2025 оны хооронд нийт 315 сая вон орчим хандив цугларсан гэж мэдээлсэн бол, сэтгүүлийн зүгээс “2006–2024 онд 960 сая вон хандивласан, энэ онд нэмэлтээр хандив өгөх” хэмээн тайлбар өгсөн байна. Хандивын бодит зарцуулалт, холбогдох байгууллагуудын үүрэг оролцоо ил тод бус байгаа талаар олон нийтийн дунд шүүмжлэл давамгайлжээ.

Мөн арга хэмжээний үеэр архи, дарс хэрэглэж буй дүр зураг ил гарсан нь ёс зүйн маргаан дагуулсан байна. Учир нь архины хэрэглээ нь хөхний хорт хавдрын эрсдэлийг нэмэгдүүлдэг тул “эрүүл мэндийн төлөө” гэсэн зорилготой арга хэмжээнд зохисгүй уур амьсгал бий болгосон гэж үзжээ.

Иргэд, сэтгэгдэл бичигчид “хандивын нэр барьсан үдэшлэг”, “жинхэнэ зорилгоо алдаж байна” гэх мэтээр шүүмжилж байгаа бол “W Korea” талаас олон нийтийн шүүмжлэлийг хүлээн авч, арга хэмжээний зорилго, хандивын зарцуулалтын талаар илүү тодорхой мэдээлэл өгөхөө мэдэгджээ.

Энэхүү дуулиан нь нийгмийн хариуцлагын нэрийн дор зохион байгуулагддаг арга хэмжээнүүд ил тод байдал, бодит үр дүнг илүү анхаарах шаардлагатайг харуулж байна.