Өчигдөр буюу ням гарагийн өглөө Парисын Луврын музейд зэвсэглэсэн дөрвөн масктай этгээд халдан орж, Францын XIX зууны хааны үнэт эдлэлүүдийг хулгайлсан хэрэг гарчээ.

Эх сурвалжуудын мэдээлснээр гэмт этгээдүүд өргөгч шат ашиглан Галери д’Аполлон танхимын цонхоор нэвтэрч, цахилгаан хөрөөгөөр шилэн хоргуудыг эвдэн нийт 9 үнэт эдлэл авч одсон байна. Хулгайчид мопед унаж, богино хугацаанд оргон зайлсан бөгөөд одоогоор Францын цагдаагийн газар тэднийг эрэн сурвалжилж байна.

Галери д’Аполлон танхим нь Луврын хамгийн алдартай үзмэрийн хэсгүүдийн нэг бөгөөд Францын хаад, хатдын титэм, энгэрийн зүүлт, үнэт чулуу бүхий эдлэлүүдийг хадгалдаг юм.