Францын Ерөнхийлөгч асан Николас Саркози Ливийн удирдагч агсан Муаммар Каддафийн засгаас хууль бус санхүүжилт авсан хэрэгт буруутай гэж үзэгдэн таван жилийн хорих ял сонслоо.

Парижийн шүүхийн шийдвэрээр Саркозиг 2007 оны Ерөнхийлөгчийн сонгуулийн кампанит ажлын үеэр Ливиэс хууль бус мөнгөн дэмжлэг авсан, мөн энэ хэрэгт бусад этгээдүүдтэй хамтран оролцсон нь тогтоогдсон байна. Түүнд таван жилийн хорих ял оноосны зэрэгцээ 100 000 еврогийн торгууль оногдуулжээ.

2025 оны 10 дугаар сарын 21-ний өглөө Саркози Парис хотын “La Santé” шоронд хоригдох ялаа эдэлж эхэлсэн гэж “Reuters”, “Le Monde” агентлагууд мэдээлэв. Энэ нь орчин үеийн Францын түүхэнд Ерөнхийлөгчийн албан тушаал хашиж байсан хүн ял эдэлж буй анхны тохиолдол болж байна.

Саркози “Би ямар ч хууль зөрчөөгүй, улс төрийн өш хонзонгийн золиос боллоо” хэмээн мэдэгдэж, шийдвэрийг давж заалдахаа илэрхийлжээ. Шүүхийн энэхүү шийдвэр нь Францын хууль ёсны тогтолцоонд “хэн ч хууль дээрээс давуу биш” гэсэн зарчмыг дахин баталсан хэмээн ажиглагчид үзэж байна.