Холимог тулаанаар хичээллэдэг байсан Г.Чинзоригт холбогдох хэргийг Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны тойргийн шүүх өчигдөр урьдчилан хэлэлцэж, шүүхэд шилжүүллээ. Г.Чинзоригийг цагдан хорих арга хэмжээг тус шүүх хэвээр үлдээжээ. 

Г.Чинзориг нь энэ оны 6 дугаар сарын 26-нд Чингэлтэй дүүргийн 12 дугаар хороонд үйл ажиллагаа явуулдаг “Халиун” авто засварын газарт найз М.Тэнгистэйгээ үл ялих зүйлээс болж маргалджээ. Ингээд М.Тэнгисийг тэвэрч унаган, нуруу, толгой хэсэгт гурван удаа өшиглөжээ. М.Тэнгисийг ухаан балартан, биеэ хамгаалах чадваргүй болсон байхад нь машины төмөр эд ангиар зодсон байна. 

Цагдаагийн байгууллага түүнийг ШШГЕГ-ын харьяа цагдан хорих 461-р ангид цагдан хорьж, мөрдөн шалгаж байна. Прокурорын байгууллагаас Г.Чинзоригт холбогдох хэрэгт Эрүүгийн хуулийн 2.8 дугаар зүйлийн 1 дэх хэсгийг журамлан Эрүүгийн хуулийн тусгай ангийн 10.1 дүгээр зүйл “Хүнийг алах”-ийн 2.1 “онц харгис хэрцгийгээр”, 2.7 “хохирогчийг биеэ хамгаалж чадахгүйг мэдсээр байж” дахь хэсэгт зааснаар, харин М.Тэнгисийг Эрүүгийн хуулийн 11.6-1 дэх хэсэгт зааснаар буюу хүний эрүүл мэндэд хөнгөн хохирол санаатай учруулсан хэмээн яллаж, хэргийг шүүхэд шилжүүлээд байна.

Эрүүгийн хуулийн 10.1 дүгээр зүйл. Хүнийг алах

2.1.онц харгис хэрцгийгээр

2.7.хохирогчийн биеэ хамгаалж чадахгүй, жирэмсэн болохыг мэдсээр байж алсан бол арван хоёр жилээс хорин жил хүртэл хугацаагаар, эсхүл бүх насаар нь хорих ял шийтгэнэ.

11.6 дугаар зүйл. Хүний эрүүл мэндэд хөнгөн хохирол санаатай учруулах

1.Хүний эрүүл мэндэд хөнгөн хохирол санаатай учруулсан бол дөрвөн зуун тавин нэгжээс нэг мянга гурван зуун тавин нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.