Өнгөрсөн хоёр жилд Монголын сонгодог урлагийн ертөнцөд болж буй магад, хамгийн том үйл явдал энэ өдрүүдэд тохиож байна. “Дэлхийн бүх цаг үеийн хамгийн шилдэг төгөлдөр хуурч” хэмээн хүлээн зөвшөөрөгдсөн, Польшийн алдарт хөгжимчин, хөгжмийн зохиолч Фредерик Шопены нэрэмжит олон улсын төгөлдөр хуурчдын III уралдааны хоёрдугаар шатны шалгаруулалт Монгол Улсын Консерваторийн Концертын Б танхимд өнөөдөр эхэлж байгаа юм. Нэгдүгээр шатнаас шалгарсан дэлхийн шилдэг мастерууд эдгээр өдрүүдэд Ф.Шопены том хэлбэрийн бүтээлүүдээс гадна С.Гончигсумлаа, З.Хангал, С.Сансаргэрэлтэх, Х.Мөнх-Ертөнц, Ш.Өлзийбаяр нарын монгол хөгжмийн зохиолчдын төгөлдөр хуурт зориулан бүтээсэн шилдэг бүтээлүүдээс оролцогчийн сонголтоор урлан тоглоно.

Уралдаан А буюу насанд хүрэгчид, В буюу өсвөр үе гэсэн ангиллаар болж байгаа бөгөөд II шатанд ОХУ, БНХАУ, Испани, Польш, Грек, БНСУ, Монгол гэсэн долоон орны 52 /А-16, В 36/ төгөлдөр хуурч авьяас билгээ сорин өрсөлдөж байна. Оролцогчдын хөгжмийн сэтгэлгээ, техникийн чадвар, Шопены бүтээлүүдийн хэрхэн амилуулж буй авьяас билгийг Ерөнхий шүүгч, Польшийн нэрт төгөлдөр хуурч, Профессор В.Швитава, шүүгч ХБНГУ-ын Мюнхен хотын хөгжмийн их сургуулийн профессор М.Беллхайм, Испани улсын Мадрид хотын Алкала де Энарес хөгжмийн консерваторийн профессор Д.Мэндмаа, СУИС-ын хүндэт профессор, нэрт төгөлдөр хуурч Ц.Энхтөр, МУК-ийн төгөлдөр хуурын тэнхимийн багш, олон улсын уралдааны шагналт, төгөлдөр хуурч Б.Номингуа нар дэнслэнэ.

Шагналын сан нь 30 сая төгрөг бөгөөд ангилал тус бүрт тэргүүн, дэд, гутгаар болон тусгай байрын шагналыг гардуулна. Түрүүлсэн төгөлдөр хуурч 3000 ам.долларын шагнал хүртэхээр байгаа нь олон улсын бусад уралдаануудтай жишихэд өндөртөө орно хэмээн зохион байгуулагчид хэлж байв. Шагнал гардуулах ёслол, гала тоглолт энэ сарын 22-ны 18.00 цагт Дуурь бүжгийн эрдмийн театрт болно.

Ф.Шопены анхдугаар уралдаан нь 2011 онд, II уралдаан 2014 онд Фридерик Шопены төрсөн өдөр буюу 3-р сарын 01-ний өдөрт зориулан зохион байгуулж байсан бөгөөд хамтран зохион байгуулагчаар БШУССЯ, Бээжин хот дахь БНПУ-ын ЭСЯ, Польшийн соёлын төв ажиллаж байжээ.

Ц.Пүрэвхүү: Цар тахлын нөхцөл байдалтай байсан ч байдал намжих байх гэсэн итгэлтэйгээр бэлтгэл ажлаа хангаж байлаа

(Монгол Улсын Консерваторийн захирал, Профессор)

Уралдаан маань өнгөрсөн сард эхэлж, өнөөдөр хоёрдугаар шатны шалгаруулалт эхлэх гэж байна. Нөхцөл байдалдаа тааруулаад эхний шатны шалгаруулалтаа цахимаар явуулсан. Хоёрдугаар шатны шалгаруулалтыг ч танхим, цахим хосолсон байдлаар хийх гэж байна. Энэ уралдаанаа явуулахын тулд бид бүтэн жилийн турш бэлтгэсэн. Цар тахлын нөхцөл байдалтай байсан ч байдал намжих байх гэсэн итгэлтэйгээр бэлтгэл ажлаа хангаж байлаа. Санаснаар болж, уралдаанаа зохиож байгаадаа баяртай байна. Энэ удаагийн уралдааны онцлог гэвэл оролцогчдын тоо урьд өмнөхөөс эрс нэмэгдсэн. Гаднаас нь харахад зөвхөн төгөлдөр хуурчдын уралдаан гэж харагдаж байгаа ч ач холбогдол цар хүрээ нь илүү өргөн үйл явдал болж байгаа. Уралдааны үеэр Польшийн Парламентын дэд дарга манай улсад албан ёсны айлчлал хийж, шагнал гардуулах ёслолд оролцоно. Манай талаас УИХ-ын дэд дарга Т.Аюурсайхан оролцож хүндэтгэл үзүүлэх юм. БНПУ-аас Монгол улсад суугаа Онц бөгөөд Бүрэн эрхт элчин сайд Ноён.К.Бойко ”Уралдааны үеэр Польшоос Монгол Улсад төрийн айлчлал хийлгэе” хэмээн амласандаа хүрч өөрөө биечлэн хөөцөлдсөөр уралдааны ач холбогдлыг өндөрт өргөж өгсөн явдалд гүнээ талархаж байгаагаа илэрхийлье.

Г.Ганчимэг: Нэгдүгээр шатаа давсан 36 хүүхдийн 19 нь монгол байна

(МУК-ын Сонгодог хөгжмийн мэргэжлийн сургуулийн захирл)

Жилийн өмнөөс ярьж төлөвлөж байсан ажил маань амжилттай бролж, үр дүнгээ үзэх гэж байгаадаа баяртай байна. Энэ онд Монгол-Польш улсын хооронд дипломат харилцаа тогтоосны 70 жилийн ой, Польш Улс Улаанбаатар хотод байнгын ажиллагаатай ЭСЯ-аа дахин нээсэн сайхан үйл явдлууд давхацсан нь Ф.Шопены нэрэмжит энэ удаагийн уралдааны ач холбогдлыг өргөж, хоёр улсын харилцаа, эв нэгдлийг улам батжуулах нэг том хөшүүрэг болголоо. Цар тахлаас болоод өнгөрсөн хоёр жилд танхимын сургалт бараг явагдаагүй. Сонгодог хөгжмийн багш бол шавьтайгаа харилцаж, сэтгэлзүйд нь нэвтэрч байж сая сургах нөхцөл бүрддэг онцлогтой тул цахимаар хичээллэхэд бэрхшээл үүсэж байсныг нуухгүй. Гэсэн ч уралдаанд амжилттай оролцож байгаад баяртай байна. Өсвөр насны ангиллаар жишээ татахад, нэгдүгээр шатаа давсан 36 хүүхдийн 19 нь монгол байна. Эндээс сургалтын түвшин муудаагүй, багш нар маань цахимаар хичээллэх арга барилаа олж эхэлсэн юм болов уу гэсэн сэтгэгдэл төрлөө.