Францын нэрт Луврын музейн “Galerie d’Apollo” танхимд 10 дугаар сарын 19-ний шөнө гарсан хулгайн ажиллагаагаар хулгайлагдсан үнэт эдлэлүүдийн зах зээлийн нийт үнэ €88 сая евро (~₮380 тэрбум) гэж Парисын прокурорын газар мэдэгдлээ.

Хулгайлагдсан эд зүйлсийн дунд Францын хаад, хатдын өмч байсан алмааз, үнэт чулуугаар чимэглэсэн титэм, зүүлт, бугуйвч зэрэг соёлын өвийн ховор бүтээлүүд багтсан бөгөөд эдгээр нь зөвхөн эдийн үнэтэй бус, Францын түүх, урлагийн өвийн чухал хэсэг гэж шинжээчид онцолж байна.

Парисын цагдаа нарын мэдээлснээр, хулгайн ажиллагаа хэдхэн минут үргэлжилж, хамгаалалтын системийг нарийн төлөвлөсөн арга техникээр саатуулсан аж. Эрэн сурвалжилгаа идэвхтэй явуулж байгаа бөгөөд хулгайч нарыг илрүүлэх, үнэт зүйлсийг эргүүлэн авахад анхаарч байна.

Энэ хэрэг нь зөвхөн эдийн хохирол бус, Францын соёл, түүхэн өвд учирсан том хохирол тул музейн хамгаалалтын бодлогыг дахин үнэлэх шаардлагатайг шинжээчид онцолжээ.