Өнгөрсөн оны арваннэгдүгээр сард болох байсан ч тодорхой шалтгаанаар хойшлодсон Монголын үндэсний олимпын хорооны ээлжит чуулган өнөөдөр болж байна. Хурлаар олон асуудал хэлэлцэхээс зохион байгуулалтын асуудал олон нийтийн анхаарлыг хамгийн их татаж байна.  МҮОХ-ны Ерөнхийлөгчийн суудлын төлөө ОУОХ-ны гишүүн, МҮОХ-ны тэргүүн дэд ерөнхийлөгч Б.Баттүшиг,  Монгол Улсын Ерөнхийлөгч асан Х.Баттулга, Монголын биатлоны холбооны ерөнхийлөгч Э.Мөнх-Очир нар нэр дэвшээд байгаа юм.

Б.Баттүшигийн тухайд, ОУОХ-ны гишүүн, МҮОХ-ны тэргүүн дэд ерөнхийлөгч боловч сагсанбөмбөг тоглож байсан гэхээс өөрөөр спорттой холбогдох түүх намтарт нь байдаггүй. Х.Баттулгын хувьд, спортод хийсэн юм ихтэй ч Ардчилсан намын даргын сонгуульд мөн нэр дэвшиж байгаа. Хоёуланд нь яллаа гэхэд ажил хэргээ хэрхэн хөтөлж явуулах нь сонин. Э.Мөнх-Очирын хувьд өмнө нь МҮОХ-ны удирдах албан тушаалд олон удаа нэр дэвшсэн ч сонгогдож байгаагүй юм. 

Харин Дэд ерөнхийлөгчийн сонгуульд МҮОХ-ны зөвлөх, соёлын гавьяат зүтгэлтэн Ж.Отгонцагаан, 3х3 сагсан бөмбөгийн холбооны хөгжил хариуцсан захирал С.Тулга, Монголын ширээний теннисний холбооны Удирдах зөвлөлийн гишүүн Ч.Амарсанаа, Монголын жюү жицүгийн холбооны гүйцэтгэх захирал О.Болд-Эрдэнэ, Монголын үндэсний олимпын академийн ерөнхийлөгч Ч.Зоригтбаатар, МҮОХ-ны ерөнхийлөгчийн үүрэг гүйцэтгэгч Ч.Наранбаатар, Монголын каноэгийн холбооны ерөнхийлөгч О.Одбаяр, Монголын триатлоны холбооны ерөнхийлөгч Ц.Сандуй, Монголын таеквондогийн холбооны хүндэт ерөнхийлөгч Д.Энхбат нар нэр дэвшжээ.

Чуулганаар мөн МҮОХ-ны Удирдах зөвлөлийн гишүүдийг сонгоно.