“Монгол Шуудан” ХК-ийн Гүйцэтгэх захирал Г.Тэлмэн Дэлхийн шуудан холбооны (UPU) ахлах шинжээч ноён Пранной Шарма болон зөвлөх үйлчилгээний “PwC” компанийн Польш дахь салбарын ахлах менежер хатагтай Магдалена Ц.Черничка нарыг хүлээн авч уулзлаа.

Дэлхийн шуудан холбооноос хэрэгжүүлж буй “Дроны хүргэлт” (Drone LIFT) төсөлд “Монгол Шуудан” ХК сонгогдон ажиллаж байгаа бөгөөд уулзалтын үеэр талууд төслийн хүрээнд хийгдэх дроны хүргэлтийн туршилт, судалгааны бэлтгэл ажлын талаар санал солилцов. “Монгол Шуудан” ХК нь “Ньюком” группийн охин компани болох “Mongolian Smart Drone Delivery” (MSDD) компанитай хамтран 2025 онд Улаанбаатар хотноо дроныг хүргэлтэд туршиж байсан туршлагатай. Гүйцэтгэх захирал Г.Тэлмэн: “Энэхүү төсөл нь өмнөх туршилтын үр дүн дээр суурилж, илүү өргөн хүрээнд буюу олон давтамжтайгаар, алслагдсан зайд хүнд ачаа тээврийг дроноор тээвэрлэх туршилтыг Улаанбаатар хотоос гадна орон нутаг руу хийж үзэх юм. Үр дүнд нь Монгол шуудангийн хүргэлтийн үйлчилгээнд дроныг нэвтрүүлэн ашиглах Техник, эдийн засгийн үндэслэлийг (ТЭЗҮ) боловсруулах учир өндөр ач холбогдолтой юм” хэмээн мэдэгдлээ.