Ойрын өдрүүдэд Монгол Улсын зарим аймаг, сумдуудад тэнгэрт туйлын ягаан туяа ажиглагдаж эхэлсэн нь нарны идэвхжил эрс нэмэгдэж, дэлхийн соронзон орчинд хүчтэй хэлбэлзэл үүссэний илрэл юм. Олон улсын сансар, цаг уурын байгууллагуудын мэдээлснээр уг үзэгдэл нь нарнаас ялгарсан солар масс хаялт дэлхийд хүрч, соронзон шуурга үүсгэснээс шалтгаалжээ.

Одоогийн байдлаар дэлхий даяар бүртгэгдэж буй соронзон шуурга нь NOAA-гийн ангиллаар G4 буюу “хүнд” түвшинд хүрсэн байна.

Соронзон шуурга нь нарнаас гарсан солар масс хаялт (CME) эсвэл нарны салхи (solar wind) дэлхийд хүрч, дэлхийн соронзон талбайтай харилцан үйлчлэлцэх үед бий болдог. Үүний хүчин зүйлийн эрчимээс хамаарч NOAA-гийн шкалаар G1 – G5 хүртэл үнэлдэг:

• G1 - Minor (хөнгөн)
• G2 - Moderate (дунд)
• G3 - Strong (хүчтэй)
• G4 - Severe (хүнд)
• G5 - Extreme (маш их) гэсэн таван түвшин байдаг аж. 

Шинжээчдийн тайлбарласнаар соронзон шуурганы хамгийн идэвхтэй үе нь ихэвчлэн 1-3 хоног үргэлжилдэг бөгөөд энэ хугацаанд шөнийн цагаар туйлын ягаан туяа ажиглагдах боломж өндөр байдаг байна. Шуурганы идэвх аажмаар буурсан ч үлдэгдэл нөлөө нь хэд хоног хадгалагдаж, зарим шөнө сул хэлбэрийн туяа дахин харагдах магадлалтайг онцолжээ.

Мэргэжлийн байгууллагуудын зүгээс хүчтэй соронзон шуурганы үед хиймэл дагуулын навигац, GPS систем, радио холбоонд түр хугацаанд доголдол үүсэх, мөн зарим иргэдэд толгой өвдөх, нойр алдагдах зэрэг мэдрэмж илэрч болзошгүйг анхааруулж байна. Харин туйлын ягаан туяаг сонирхон харахыг хүссэн иргэд гэрлийн бохирдол багатай, илүү нээлттэй орчинд, хойд зүгийг харж ажиглах нь илүү тохиромжтойг зөвлөжээ.

Соронзон шуурганы нөхцөл байдал ойрын өдрүүдэд өөрчлөгдөж болзошгүй тул холбогдох байгууллагууд сансрын цаг агаарын мэдээллийг тогтмол шинэчилж, олон нийтэд хүргэж ажиллаж байна.