Дэлхийн уул уурхайн салбарын тэргүүлэгч компаниудын нэг Rio Tinto групп өөрийн Гүйцэтгэх захирал Саймон Троттын жилийн зорилтот цалин, урамшууллын багцыг 56 хувиар нэмэгдүүлж, 9.8 сая фунт стерлинг буюу ойролцоогоор 13.06 сая ам.долларт хүргэх санал боловсруулаад байна.

Уг саналын дагуу Гүйцэтгэх захирлын тогтмол авдаг үндсэн цалин өөрчлөгдөхгүй бөгөөд зөвхөн компанийн гүйцэтгэлээс хамаарч олгодог урамшууллыг нэмэхээр тусгажээ. Тодруулбал, богино хугацааны урамшууллын дээд хязгаарыг үндсэн цалингийн 200 хувиас 300 хувь, урт хугацааны гүйцэтгэлд суурилсан урамшууллыг 500 хувиас 900 хувь болгон өсгөхөөр төлөвлөсөн байна. Хэрэв Саймон Тротт компанийн бизнесийн бүх зорилтуудыг дээд түвшинд биелүүлж чадвал түүний жилийн нийт орлого 63 хувиар өсөж, 24.4 сая ам.доллар хүрэх боломжтой юм.

"Рио Тинто" группын ТУЗ уг шийдвэрээ олон улсын хөдөлмөрийн зах зээлд өрсөлдөх чадвараа хадгалах, топ түвшний менежерүүдээ батлан хамгаалах, сансар судлал, эрчим хүчний бусад томоохон компаниуд руу алдахаас сэргийлэх зорилготой хэмээн тайлбарлаж байна. Саймон Тротт нь 2025 оны дундуур тус албан тушаалд томилогдсоноосоо хойш компанийн хагас жилийн үндсэн ашгийг 43 хувиар өсгөж, бүтцийн өөрчлөлтийг амжилттай удирдаж байгааг ТУЗ онцолжээ.

Гэвч энэхүү санал нь хөрөнгө оруулагчид болон олон нийтийн зүгээс багагүй шүүмжлэл дагуулж эхэллээ. Дэлхий даяар амьжиргааны өртөг нэмэгдэж, компаниуд зардлаа танаж буй энэ үед удирдлагын урамшууллыг огцом нэмэх нь компанийн нэр хүндэд сөргөөр нөлөөлж болзошгүй гэж зарим шинжээчид үзэж байна. Түүнчлэн уг санал батлагдвал Саймон Тротт Австралийн хамгийн өндөр цалинтай гүйцэтгэх захирлуудын нэг болж, гол өрсөлдөгч "BHP" компанийн захирлын урамшууллаас давах тул салбарын хэмжээнд цалингийн инфляц хөөрөгдөх эрсдэлтэйг сануулж байна.

Уг цалин, урамшууллын шинэ багцыг албан ёсоор хэрэгжүүлэхийн тулд "Рио Тинто" компани одоогоор хөрөнгө оруулагчидтайгаа зөвлөлдөж байгаа бөгөөд ирэх 2027 онд болох хувьцаа эзэмшигчдийн ээлжит хурлаар эцэслэн батлуулах шаардлагатай юм.

Эх сурвалж: Mining.com