БНСУ-ын Кёнсан мужийн Гусон сумын захиргаанаас жил бүр уламжлал болгон зохион байгуулдаг “Тас шувууны өдөр” арга хэмжээ болж өнгөрлөө. Жил бүр дунджаар 2000 орчим тас шувуу БНСУ-ыг зорин ирдэг бөгөөд тэднээс 800 орчим нь Гусон суманд тогтмол ирж өвөлждөг болсон бөгөөд энэ тоо жилээс жилд өсөж байна. Арга хэмжээний үеэр Монголын уламжлалт урлагийн тоглолт, Монголоос ирсэн тас шувууг хооллох ёслол, Монгол үндэсний хоол танилцуулах зэрэг үйл ажиллагаа зохион байгуулагдаж, нийт 300 гаруй иргэд, жуулчид үзэж сонирхжээ. Тас шувуу нь ан хийдэггүй, зөвхөн үхсэн амьтны сэгээр хооллож байгаль экологийг цэвэрлэх чухал үүрэгтэй тул “Дэлхийг анагаагч” хэмээн нэрлэгддэг байна. Монгол тас шувуу нь Монгол Улсаас 3000 гаруй км замыг 14 хоногийн турш тасралтгүй нүүдэллэн туулж БНСУ-д ирдэг онцгой нүүдэлчин шувуу юм.