Цаг уурын өртөө харуулын бодит ажиглалтын мэдээлэл, хиймэл дагуулын мэдээ болох ган, зуншлага, 2025-2026 оны өвөл-хаврын бэлчээрийн даац, бэлчээрийн ургац, агаарын температур, хур тунадасны дундажтай харьцуулсан хазайлт, 11 дүгээр сарын 10-ны өдрийн байдлаарх цасны зузаан болон 11 дүгээр сарын цаг агаарын урьдчилсан төлөв зэрэг мэдээлэлд үндэслэн ЗУД-ын урьдчилсан төлөвийг тооцоолон гаргалаа.

Зудын урьдчилсан төлвөөс харахад мал өвөлжилт нийт нутгийн 2%-д нэн их, 16%-д их, 36%-д дунд, 29%-д бага, 17%-д хүндрэлгүй байхаар байна. Өөрөөр хэлбэл, Баян-Өлгий, Увс, Ховдын ихэнх, Хөвсгөл, Өвөрхангай, Архангай, Баянхонгор, Төвийн зарим нутгаар зудын хүндрэл/эрсдэл үүсэх төлөвтэй байна.  Цаашид цасны зузаан нэмэгдэн хүйтний эрч чангарах үед цаг агаарын бодит нөхцөл болон нарийвчлан боловсруулсан урьдчилсан мэдээгээр уг үнэлгээг тухай бүр шинэчлэн мэдээлэх болно.