Тулгар төрийн 2233 жил, Их Монгол Улс байгуулагдсаны 818 жил, Үндэсний эрх чөлөө, Тугаар тогтнолоо сэргээн мандуулсны 113 жил, Ардын хувьсгалын 103 жилийн ойн үндэсний их баяр наадам нээлтээ хийхэд тун бага хугацаа үлджээ. Наадмаас өмнө шийдэх, зохицуулах ажлууд нэгээр тогтохгүй их бий. Мэдээж хамгийн чухал нь бөхчүүдийн цол чимэгний асуудал. Спортын арбитраас улсын арслан М.Бадарчийг буруугүйгээ нотолж чадаагүй, допинг хэрэглэсэн гэж үзсэн. Гэхдээ нөгөө талаас Үндэсний их баяр наадам зохион байгуулах хороо тамирчны эрхийг хамгаалж, түүний тайлбар сонсч, хамтарч ажиллах санал тавиагүй гэжээ. Улмаар М.Бадарчид хэн хориотой бодисыг санал болгосон, яаж олж авсан, ямар замаар хэрэглэсэн гэдгээ тайлбарлах, допинг хэрэглэсэн гэдгээ хүлээн зөвшөөрсөн тохиолдолд шийтгэлийн хугацааг багасгаж барилдах эрхийг нэг жилээр хасах зэрэг боломж байгааг хэлжээ.

Үндэсний их баяр наадмыг зохион байгуулах хорооны зүгээс ч улсын арслан М.Бадарчийн цолыг хурааж, түүнд унасан бөхчүүдэд цолыг нөхөн олгох саналыг ирэх наадмаас өмнө Монгол Улсын Ерөнхийлөгчид уламжилсэн сурагтай. Гагцхүү Ерөнхийлөгчийн зүгээс цол хураах болон нөхөн олгох зарлиг гаргаснаар энэ хэрэг маргаан эцэс болно.

Ерөнхийлөгчийн зарлиг гарвал дараах бөхчүүд цол нэмнэ 

• Аймгийн хурц арслан Бүрнээгийн Баянмөнхийг тав давсанд тооцож улсын начин,
• Өсөх идэр начин Эрдэнэбатын Дашийг зургаа давсанд тооцож улсын харцага,
• Улсын харцага Сүхбаатарын Сүхбатыг долоо давсанд тооцож улсын заан,
• Улсын гарьд Цэрэнсодномын Бямба-Отгоныг ес давсанд тооцож улсын арслан,
• Улсын аварга Оргихын Хангайд “үлэмж бадрах” чимэг, цол тус тус нөхөн олгоно

Харин улсын арслан М.Бадарч улсын гарьд цолон дээрээ эргэн бууна.

М.Бадарчийн тухайд Спортын арбитрын тавьсан саналыг хүлээн авч, буруутай гэдгээ хүлээн зөвшөөрч, нэг жилээр эрхээ хасуулах болов уу гэж бөх сонирхогчид харж байна. Угаасаа барилдаагүй бараг нэг жил болж байгаа учир энэ хугацаагаа тооцуулж, ирэх намраас барилдах байх гэсэн яриа гарчээ.