Бөхийн төрлүүдийн энэ оны насанд хүрэгчдийн Ази тивийн АШТ Казахстаны Астана хотноо болж байна. Тэмцээн энэ сарын 9-нд сонгомол бөхийн төрлөөр эхэлсэн бөгөөд манайхны гол найдлага тавьдаг чөлөөт бөхийн тэмцээн өнөөдөр эмэгтэйчүүдийн 50, 55, 68, 76 кг-ын жингийн барилдаанаар эхэлнэ. Дээрх жингүүдийн урьдчилсан, хагас шигшээ, торгуулийн тойргийн барилдаан өнөөдөр, медалийн төлөөх барилдаан маргааш болох юм.

Бид та бүхэндээ өнөөдөр дэвжээнд гарах бөхчүүдийнхээ оноолтыг танилцуулж байна.

50 кг. ОУХМ Цогт-Очирын Намуунцэцэг эхний даваанд “Осло 2021” ДАШТ, “Улаанбаатар 2022” Азийн АШТ-ий аварга, Японы бөх Ремина Ёшимотой учраа таарсан. Түүнийг ялбал БНХАУ-ын Зичи Фенгтэй барилдана.

55 кг. Чинболдын Отгонтуяа эхний тойрогт Вьетнамын Нгуен Тин Ми Трангтай таарчээ. Ялбал хагас шигшээд Казахстаны Мария Седнева, Энэтхэгийн Сито Ситогийн ялсантай мөнгөн медалийн төлөө барилдах нь.

68 кг. ОУХМ Энхсайханы Дэлгэрмаа шөвгийн наймд Энэтхэгийн Ниша Нишатай таарчээ. Түүнийг хожвол Японы Айми Ишийтэй барилдах төлөв харагдана.

76 кг. Г.Ариунжаргал шөвгийн наймд Японы Мизүки Нагашиматай барилдана. Ялбал хагас шигшээд БНХАУ, БНСУ, Вьетнамын аль нэгэнтэй барилдана.