Дэлхийн бөхийн нэгдсэн холбооноос ОХУ, Беларусийг тэмцээнд оролцуулахгүй байх шийдвэр гарчээ. Гүйцэтгэх зөвлөл нь хуралдаад дээрх шийдвэрийг гаргасан байна. ОУОХ-ноос олон улсын спорт холбоодод хүргүүлсэн шахалт, шаардлагын дагуу ингэж шийдсэн аж. ОХУ-тай нягт хамтын ажиллагаатай ДБНХ шийд гаргахаас түдгэлзэж байсан ч Украины бөхийн холбооноос шаардсан тул хасахаас аргагүй болсон юм. Холбооноос гаргасан мэдэгдэлд “Дэлхийн бөхийн их гэр бүл, дэлхийн бөхийн нэгдсэн холбоо дайн хөлд нэрвэгдсэн Украины ард түмэнтэй сэтгэл санаагаар хамт байгаа гэдгээ юуны өмнө илэрхийлье. Гүйцэтгэх зөвлөл өнөөдөр ОУОХ-нөөс өнгөрсөн сарын 28-ны өдөр гаргасан “ОХУ-ыг тэмцээн уралдаанд оролцуулахгүй байх” зөвлөмжийг хэлэлцлээ. Холбооноос энэхүү эмгэнэлтэй нөхцөл байдлыг хэлэлцээд ОХУ, Беларусын тамирчин, дасгалжуулагч, албаны хүмүүсийг ДБНХ-ны хуваарьт орсон бүх тэмцээн уралдаанд оролцуулахгүй байх шийдвэр гаргалаа. Мөн тус хоёр улсад 2022 онд болох байсан бүх тэмцээнийг цуцаллаа” гэжээ. Гэхдээ нөхцөл байдал өөрчлөгдмөгц зохих шийдвэрийг яаралтай гаргахаа илэрхийлсэн байна.