Хилийн цэргийн баатар хилчин, Дэд хурандаа, Дэлхийн зулай Эверестийн оргилд анхны авиралтын түүх бүтээсэн, Олон улсын хэмжээний мастер ахмад уулчин Н.Жуков Монгол Улсын ГАВЬЯАТ тамирчин цол хүртлээ. Монголын баруун хил, Цаст Алтайн нуруунд халуун залуу наснаасаа зүтгэсэн Н.Жуковыг хамтран ажилласан нөхөд нь “Баатар” хэмээн хүндэлдэг. Тэрбээр хилийн албаны хүнд бэрх үүргээс гадна уулын спортоор тууштай хичээллэж, 1980-аад оноос эхлэн зөвхөн Алтай Таван Богдын Хүйтэний оргилд гэхэд л 70 гаруй удаа гарчээ. Мөн дэлхийн дээвэр Гималай, Эверест, Эльбрус зэрэг дэлхийн ноён оргилуудад амжилттай авирсан бахархалт уулчин юм.

1996 онд Монголын уулчдаас ганцаараа шалгаран, дэлхийн шилдэг уулчидтай мөр зэрэгцэн Эверестийн оргилд хүрсэн нь манай улсын хувьд түүхэн анхны тохиолдол болсон билээ. Энэхүү авиралт нь олон бэрхшээл, эрсдэлийг даван туулсан гэдгээрээ дэлхийн түүхэнд тэмдэглэгдэж, кинонд хүртэл мөнхөрсөн байдаг. Тэрбээр цаст Алтайн хилд нэгэн насны амьдралаа зориулж, олон удаагийн хилийн зөрчлийг илрүүлэн, зориг самбаагаар саатуулж явсан гавьяатай нэгэн.