2026 оны Милан-Кортина өвлийн Олимпын наадам эхлээд удаагүй байхад шагналын медалиуд хугарч, туузнаасаа салсан хэд хэдэн тохиолдол бүртгэгдэж, зохион байгуулагчид албан ёсоор шалгаж эхэлсэн талаар олон улсын хэвлэлүүд мэдээллээ.

Зарим тамирчдын медаль шагнал гардуулах ёслолын дараа баяр тэмдэглэх үеэр тасарч, эвдэрсэн байна. Тухайлбал, АНУ-ын хурдны цанын тамирчин Breezy Johnson-ы алтан медаль үсрэх үед нь туузнаасаа салсан бол Шведийн кросс-кантригийн тамирчин Ebba Andersson, Германы биатлоны тамирчин Justus Strelow нарын медаль мөн адил гэмтсэн талаар мэдээлсэн байна. АНУ-ын уран гулгагч Alysa Liu ч медалийнх нь тууз салсан тухайгаа олон нийтэд хуваалцжээ.

Олимпын наадмыг зохион байгуулагчид медалийн тууз болон холбох хэсэгт асуудал үүссэн байж болзошгүй гэж үзэж байгаа бөгөөд зарим медальд хамгаалалтын зориулалттай “тасардаг” механизм ашигласан нь ийм нөхцөл байдалд нөлөөлсөн байх магадлалтай гэж тайлбарласан байна. Одоогоор медалийн хийц, бэхэлгээний чанарыг нарийвчлан шалгаж байгаа аж.