Казахстаны Спорт, аялал жуулчлалын сайд Ербол Мырзабосынов тус улсын олимпын шигшээ багийн хувцас Монголын багийнхтай харьцуулахад төдийлөн сайхан харагдахгүй байгаа гэх шүүмжлэлд тайлбар өгсөн талаар NUR.KZ сайт мэдээлжээ.

Сэтгүүлчид түүнээс сошиал орчинд Монголын багийн хувцсыг илүү загварлаг, үндэсний онцлог шингээсэн хэмээн магтаж байхад Казахстаны багийн хувцас харьцангуй энгийн, сэтгэлд хүрэхгүй байна гэсэн шүүмжлэлд ямар байр суурьтай байгааг нь асуусан байна.

Сайд хариулахдаа, “Казахстаны багийн парадын буюу нээлтийн ёслолд өмсөх хувцсыг дотоодын үйлдвэрлэгч брэндээр үнэ төлбөргүй хийлгэсэн бөгөөд загварын хувьд олон нийтийн санал, спортын байгууллагуудын зөвлөмжийг харгалзан баталсан” гэжээ.

Түүний хэлснээр уг хувцас нь албан ёсны арга хэмжээнд зориулсан бөгөөд тэмцээний үеэр өмсөх спортын иж бүрэн хэрэглэл нь тусдаа гэрээгээр олон улсын брэндтэй хамтран хийгдсэн байна. Мөн эдгээр спортын хувцас нь төсвийн бус эх үүсвэрээр шийдэгдсэн гэдгийг онцолжээ.

Казахстаны олимпын багийн хувцасны иж бүрдлийг өнгөрсөн оны 12 дугаар сарын сүүлээр албан ёсоор танилцуулсан бөгөөд үүнтэй холбоотойгоор сошиал орчинд харьцуулсан шүүмжлэл өрнөөд байгаа юм.