Олон улсын олимпын хороо, Азийн олимпын зөвлөлөөс 2026 оноос таван том наадмыг зохион байгуулна. “Милан-Кортина 2026” өвлийн олимпын наадамд оролцох Монгол Улсын багийн ахлагчаар УИХ-ын гишүүн Ч.Номин ажиллана. Тэгвэл бусад томоохон наадамд оролцох багийн ахлагч нарыг МҮОХ-ны гүйцэтгэх зөвлөлөөс албан ёсоор томилжээ. Африк тивд анх удаа болох залуучуудын зуны олимпын наадмын Монголын багийг УИХ-ын гишүүн, ССАЖЗ-ын сайд Ч.Ундрам ахална. Уг наадам Сенегалын Дакар хотод аравдугаар сарын 31-д эхэлнэ.

Азийн олимпын зөвлөлийн ивээл дор дөрөвдүгээр сарын 22-нд эхлэх “Санья-2026” элсний наадамд оролцох багийн ахлагчаар МҮОХ-ны гишүүн, Монголын 3х3 сагсан бөмбөгийн холбооны ерөнхийлөгч Л.Мягмаржавыг томилжээ. Харин арваннэгдүгээр сард Саудын Арабын Эр Рияд болох Азийн танхимын болон тулааны спортын наадамд оролцох Монголын багийг Ерөнхийлөгчийн Тамгын газрын дарга А.Үйлстөгөлдөр ахлахаар болсон байна.