Биеийн тамир, спортын улсын хорооноос олимп, паралимп, дэлхийн аварга шалгаруулах тэмцээнээс медаль хүртсэн тамирчдад сар бүр мөнгөн урамшуулал олгож байна. 2025 онд олимп, паралимпын наадам, дэлхийн аварга шалгаруулах тэмцээн /олимп, паралимпын зай, жин, төрөл/-ээс медаль хүртсэн 11 спортын нийт 78 тамирчинд сар бүрийн мөнгөн урамшуулал олгож байгаа.

Үүнээс хамгийн өндөр буюу 14 сая төгрөгийг нэг тамирчин, хамгийн бага нь буюу 500 мянган төгрөгийг 22 тамирчин сар бүр авч байна.

Монгол Улсын шигшээ багийн тамирчид 2025 онд долоон спортын дэлхийн аварга шалгаруулах тэмцээн (олимп, паралимпын наадмын хөтөлбөрт багтсан спортын төрөл, жин, зай)-ээс нийт 11 медаль хүртжээ.

Тухайлбал, чөлөөт бөхийн төрөлд П.Орхон, жүдо бөхийн төрөлд К.Ёолк, Б.Ганхайч нар хүрэл, боксын төрөлд А.Баттулга мөнгө, Л.Алтанцэцэг хүрэл, 3х3 сагсан бөмбөгийн төрөлд эмэгтэй баг мөнгө, пара жүдо бөхийн төрөлд Л.Туруунаа, эрэгтэй баг хүрэл медаль, пара пауэрлифтингийн төрөлд Э.Содномпилжээ мөнгө, пара байт харвааны төрөлд холимог баг алт, эмэгтэй баг алтан медаль хүртсэн байна.

Эдгээр тамирчид дунд анх удаа дэлхийн аварга шалгаруулах тэмцээнээс медаль хүртсэн цөөнгүй байна. Мөн хоёр болон түүнээс дээш дэлхийн медаль хүртсэн тамирчин ч бий. Эдгээр тамирчдад ирэх 2026 оны нэгдүгээр сарын 1-нээс сар бүрийн мөнгөн урамшууллыг шинээр болон нэмж олгох юм.