Японы мэргэжлийн сагсан бөмбөгийн B.League лиг ирэх оны нэгдүгээр сард болох драфтын тамирчдын жагсаалтаа шинэчилж, гурван тоглогчийг шинээр нэмснээр энэ жил нийт 70 тамирчин оролцохоор боллоо. Тэдний нэг нь Aoyama Gakuin University багийн ахлагч, Монгол залуу О.Тулга юм.

О.Тулга нь 181 см өндөр, 73 кг жинтэй довтлогч. Японы их сургуулийн лигт нэг тоглолтод дунджаар 10,3 оноо, 3,2 удаагийн самбар авалттай тоглож иржээ. 

Тэрбээр Монголд төрсөн бөгөөд бага насандаа өвөө дээрээ өсөж байгаад бага ангид орох жилээ Японд ирсэн байна. Аав нь Сакайгава дэвжээнд “Широнорюү” нэрээр барилдаж, жюүрёо зиндаанд манлай бөх байсан бөгөөд анх Тулга аавынхаа жишээгээр сүмо барилдах хүсэлтэй байжээ.

Гэвч Японд ирсний дараа анх япон найзынхаа нөлөөгөөр сагсан бөмбөг сонирхож эхэлжээ. Эхэндээ хэлний бэрхшээлтэй байсан ч найз нь тоглохыг уриалж, улмаар секцийн багт хамт орсон нь түүнд спортын замыг нээсэн байна. Хэдхэн жилийн дотор сагсан бөмбөгийн амтыг мэдэрч, найз нөхөд олж, мэргэжилтнүүдийн анхааралд өртсөн нь энэ юм.