Монголын Үндэсний бөхийн холбооноос гурав дахь удаагаа зохион байгуулж буй Алтан цомын төлөөх барилдаанд энэ жил үндэсний найман компанийн баг тойргоор барилдаж байгаа билээ.

Нийт найман багийн дунд “АПУ-Скайтел” баг, улсын арслан Б.Орхонбаяр тэргүүлэн, хоёр хожилтой 35 даваагаар тэргүүлж эхэлсэн байна. Харин “М-Си-Эс Энержи” баг, улсын арслан Э.Батмагнайгаар ахлуулсан баг 32 даваагаар удаалж байна. “Хатант интернэшнл” баг, улсын арслан Р.Пүрэвдагваар ахлуулсан баг 27 даваагаар удаалж байгаа аж.

Мөн улсын аварга О.Хангай ахлагчтай “Од групп” болон улсын арслан Ц.Бямба-Отгон ахлагчтай “Хубилай хаан” багууд нэг хожил, нэг хожигдолтой тэмцээнээ үргэлжлүүлж байна. Харин “Хамаг Монгол”, “Эв Монгол”, “Хүлэгү” багууд одоогоор хожилгүйгээр тэмцээнээ үргэлжлүүлж байгаа юм.

Хувийн барилдааны дүнгээр улсын арслан Э.Батмагнай 10 барилдаанаас 10 даваатай ганцаараа тэргүүлж байгаа бол, улсын арслан Э.Бямба-Отгон, улсын заан М.Лхагвагэрэл, улсын харцага Б.Цэдэнсодном, аймгийн арслан Д.Алтанцоож нар 9 даваа, 1 унаатайгаар удаалж байна.