Монголын эрэгтэйчүүдийн волейболын шигшээ багийн тамирчин Б.Батсуурь Энэтхэгийн дээд лигийн “Ahmedabad Defenders” багт тоглож байгаад эх орондоо ирж, Үндэсний дээд лигийн шинэ улирлын тоглолтод оролцож эхэллээ.

Тэрбээр энэ улиралд “SG Hawks” багтаа ахлагчаар эргэн нэгдэж, өнгөрсөн лхагва гарагт “Darkhan Moguls” багийн эсрэг хийсэн тоглолтод 3:2 харьцаатай ялагдал хүлээжээ.

“SG Hawks” баг энэ улиралд Венесуэлээс легионер тамирчин, Японоос дасгалжуулагч Кожи Цүзүрабараг урин ажиллуулж байгаа юм.

Монголын Үндэсний дээд лигийн албан ёсны нээлт маргааш болох бөгөөд энэ удаагийн тэмцээнд нийт 16 баг өрсөлдөнө. Тоглолтуудын дийлэнх нь “АСА Арена”-д болохоор товлогджээ.