Үндэсний их баяр наадмын хүчит 512 бөхийн барилдаанд найм давж үзүүрлэж Улсын гарди цол хүртсэн Сүхбаатар аймгийн Онгон сумын харьяат Н.Өсөхбаяраас допингийн төрлийн хориотой бодис илэрсэн. Тэрбээр өөрөө ч хүлээн зөвшөөрч, үүнийгээ шалгуулна гэдгээ цахим хуудсаараа мэдэгдэж байсан. Түүнд ямар хариуцлага тооцох нь өнөөдрийг хүртэл тодорхойгүй байсан юм.

WHITE.MN сайт энэ талаар Бөхийн салбар хорооны дарга Н.Мягмараас тодруулсан байна. Тус тодруулгад, "Допинг илэрсэн баяр наадмын үзүүр бөх, Улсын гарди Н.Өсөхбаярын цолыг хурааж, барилдах эрхийг гурван жилээр хасах саналыг баяр наадам зохион байгуулах хороонд хүргүүлсэн. Тухайн хорооны хурал удахгүй товлогдож, энэ асуудлыг шийдвэрлэх байх" гэжээ.