Хорват улсын нийслэл Загреб хотод болж буй чөлөөт бөхийн дэлхийн аварга шалгаруулах тэмцээнээс Монголын шигшээ багийн тамирчин Т.Тулга мөнгөн медаль хүртэж, Монголын багийн эхний медалийг авсан билээ. Тэгвэл эмэгтэйчүүдээс 59 кг жинд Т.Алтжин Дэлхийн бөхийн нэгдсэн холбооны нэр дээр барилдсан орос бөх Анастасия Сиделниковаг 6:4-өөр ялснаар хүрэл медаль хүртсэн байна. Ингэснээр тэрбээр Монголын баг тамирчдын 81 дэх медаль, 45 дахь хүрэл медальтан болов. Тэмцээний тав дахь өдөр өнөөдөр үргэлжилж буй бөгөөд эмэгтэйчүүдээс 53 кг жинд Ц.Намуунцэцэг, 62 кг жинд П.Орхон, 68 кг жинд Э.Дэлгэрмаа, 72 кг жинд З.Болортунгалаг нар хүч үзнэ. Харин 50 кг жинд Б.Мөнхнар, 65 кг жинд Т.Энхжин нар хүрэл медалийн төлөө барилдана.