Их Британийн Ливерпүүл хотноо сонирхогчдын боксын насанд хүрэгчдийн дэлхийн аварга шалгаруулах тэмцээн энэ сарын 4-14-ний өдрүүдэд зохион байгуулагдаж байна. Тэмцээнд 66 орны 540 (эрэгтэй 327, эмэгтэй 213) тамирчин хүч сорьж байгаа юм.

Монгол Улсаас Үндэсний шигшээ багийн дасгалжуулагч О.Батхүү, Ж.Еркин, Рубен Пинейро Санчес нарын удирдлага дор эрэгтэй тав, эмэгтэй таван тамирчин оролцож байна.

Шөвгийн наймд буюу хүрэл медалийн төлөөх даваанд Монголын тав ширэн бээлийнтэн шалгарч үлдлээ. Тодруулбал:

• Эмэгтэйчүүдийн 48 кг – Л.Алтанцэцэг Японы Хиккарү Шинохаратай
• Эмэгтэйчүүдийн 51 кг – Б.Мөнгөнсаран Узбекистаны Феру Казаковатай
• Эрэгтэйчүүдийн 50 кг – А.Баттулга БНСУ-ын Юн Тэгүнтэй
• Эрэгтэйчүүдийн 55 кг – Х.Билгүүнсайхан Испанийн Серрона Рафаэльтай
• Эрэгтэйчүүдийн 70 кг – О.Бямба-Эрдэнэ Их Британийн Камара Оделтэй тус тус хүрэл медалийн төлөө өрсөлдөнө.

Монголын боксчид насанд хүрэгчдийн ДАШТ-ээс өмнө нь нийт 16 медаль хүртсэн бөгөөд анхны медалийг 1982 онд гавьяат тамирчин Р.Отгонбаяр (57 кг-д мөнгө) хүртэж байв. Харин хамгийн сүүлд гавьяат тамирчин Б.Чинзориг (63.5 кг-д мөнгө), Б.Мишээлт (67 кг-д хүрэл) нар медаль хүртсэн түүхтэй.

Эх сурвалж: Биеийн тамир, спортын улсын хороо