Цахим спортын ертөнцөд монголчууд гэлтгүй дэлхий дахиныг шуугиулж буй “The Mongolz” багийн тухай таны заавал мэдэх ёстой зүйлсийг танилцуулж байна.

Анх хүмүүс цахим спортыг “подволд тоглодог” хобби гэж л ойлгож, мэргэжлийн спорт гэж тоодоггүй байлаа. Харин “The MongolZ” багийн залуус мянга мянган цагийн хичээл зүтгэл, тэсвэр хатуужил, багийн уялдаа холбоо, стратеги боловсруулалтдаа анхааран олон улсын хэмжээний том тэмцээнүүдэд нэрээ цуурайтуулж чадсан.

Тэдний замд олон бэрхшээл тулгарч байсан ч бууж өгөөгүй, Монголын цахим спортод шинэ хуудас нээсэн урам зоригийн билэг тэмдэг боллоо. Финалын ширүүн тоглолтод Францын “Vitality” багтай өрсөлдөж 1-2 харьцаагаар ялагдсан ч дэлхийн 1,281,513 үзэгчийн анхаарлыг татаж, Монголын нэрийг мандуулсан нь цахим спортын түүхэнд шинэ амжилт болсон.

Цахим спорт одоо зөвхөн тоглоом биш, хурдтай бодолтой, багийн уялдаа холбоо, стратеги шаарддаг жинхэнэ спорт гэдгийг “The MongolZ” баталж, Монголын залуусын авьяас чадвар, хүсэл тэмүүлэл хэрхэн дэлхийд танигдаж болохыг харууллаа.

Энэхүү амжилт нь зөвхөн нэг багийн амжилт төдийгүй Монголын спортын ирээдүйн шинэ зам, бахархлын эх үүсвэр болж, цахим спортын хөгжилд шинэ түлхэц өгөхөд чухал үүрэгтэй. Ирээдүйд “The MongolZ” багийн залуус дэлхийн томоохон тэмцээнүүдийг эзэгнэж, Монголын нэрийг дахин дахин өндөрт өргөхийг бид итгэл төгс хүлээж байна.

The Mongolz багийн тухайд: 

Өнөөдрийн The MongolZ багийн бүрэлдэхүүнд:

1. Б.Гарьдмагнай “bLitz”
2. М.Содбаяр “Techno4K”
3. Б.Өсөхбаяр “910”
4. Б.Аюуш “mzinho”
5. М.Азбаяр “Senzu” гэсэн тамирчдаас гадна дасгалжуулагч Б.Эрдэнэдалай буюу "maaRaa" багтаж байна.

Одоогийн бүрэлдэхүүн нэгдснээс хойших тэдний амжилтаас дурдвал:

• "The MongolZ" анхны тэмцээн болох "CS Major Copenhangen"-д оролцож, elimination stage-д шалгарсан анхны Монгол баг
• Абу Даби хотноо "CS2"-ын “yaLLa Compass 2024” тэмцээнд ялж, Counter-Strike тоглоомын "Major" тэмцээнд оролцох эрхийг олгох бүсийн чансаа тогтоох тэмцээн буюу “PGL "Major Copenhagen 2024” тэмцээнээс шалгарч анхны стикэрээ авсан
• Түүхэн дэх хамгийн өндөр шагналтай тэмцээн “Thunderpick Championship 2024”-т түрүүлж аваргаа бататгасан
• "Perfect word Shanghai Major 2024" тэмцээнд оролцох эрхээ авч, плэй-оффын шатанд шалгарч азиуд европын хүчтэй багуудтай эн тэнцэх хэмжээнд чансаагаа харуулсан.

Тэд 2024 онд оролцсон тэмцээнүүдээсээ хүртсэн шагналын орлогоороо дэлхийд гуравдугаарт эрэмбэлэгдэж байсан удаатай.

• PGL Major Copenhagen 2024: XV-XVI дугаар байр 20 мянган доллар
• ESL Pro League Season 19: IX-XII байр 23,5 мянган доллар
• yaLLa Compass 2024: Аварга, 200 мянган доллар
• Esport World Cup 2024: IX-XII байр 25 мянган доллар
• Skyesport Championship 2024: Дэд аварга-70 мянган доллар
• IEM Rio 2024: VII-VIII байр 6 мянган доллар
• ESL Pro League Season 20: IX-XII байр 23.5 мянган доллар
• IEM Cologne 2024: IX-XII байр 16 мянган доллар
• ESL Challenger at Dreamhack Summer 2024: V-VI байр 3 мянган доллар
• IEM Katowice 2024: XVII-XX байр 4.5 мянган доллар
• Elisa Masters Espoo 2024: III-IV байр 15 мянган доллар
• Thunderspick World Championship 2024: Аварга, 500 мянган доллар
• Perfect word Shanghai Major 2024: V-VIII байр 45 мянган доллар

Нийлбэр дүнгээрээ "The MongolZ" жилийн дотор 951,500 доллар буюу 3 тэрбум 254 сая 130 мянган төгрөгийн шагнал хүртэж байсан. 

The Mongolz баг хуучин бүрэлдэхүүнээрээ 2016 онд IEM Taipei-д аваргалсан нь тэдний түүхэнд бичигдэх анхны ялалтуудын нэг байв. Ингэж тэд олон улсын тавцанд гарах эхлэлээ тавьсан билээ. Харин одоогийн бүрэлдэхүүнээрээ Yalla Compass 2024 тэмцээнд ялалт байгуулж, PGL Major Copenhagen 2024 тэмцээнд Азийн RMR-аас шалгарч анхны стикэрээ авсан нь мөн л түүхэн хожлууд байв. Багийн спортод хамгийн чухал нь эв нэгдэл.

Mongolz багийн хувьд багийн тоглогч бүр тус тусын үүргээ тултал биелүүлдэг. blitz-ийн багаа чиглүүлдэг уран гоё “call”-ууд, Techno-ийн зоримог, давшсан тоглолт, 910-ын оновчтой, мэргэн буудалт, Mzinho-ийн торгон мэдрэмжтэй тоглолт, Senzuийн тэсрэлттэй тоглолт. Мэдээж дасгалжуулагчийн ур ухаан. Энэ бүгд нийлээд Mongolz багийг амжилтад хөтөлсөн юм.