Алжирын боксчин, олимпын аварга, дэлхийн хэмжээний од Иман Хелиф жендерийн маргаантай холбоотой асуудлаас үүдэн боксоор хичээллэхээ больсон тухай түүний менежерээр ажиллаж байсан Нассер Йесфах Le Parisien сонинд өгсөн ярилцлагадаа мэдэгдсэн байна.

Йесфахийн ярьснаар, Хелифийн хувьд жендерийн асуудлаас үүдэн олон нийтийн анхааралд өртсөн үйл явдлууд нь боксын карьерт нь сөргөөр нөлөөлсөн бөгөөд энэ нь түүнийг бие даан шийдвэр гаргаж, боксоор хичээллэхээ больход хүргэсэн гэжээ.

И.Хелиф болон Тайванийн Лин Юйтин нар Парис-2024 Олимпын наадмын боксын 66кг ба 57 кг-ийн жингүүдэд түрүүлсэн билээ. 2023 оны ДАШТ-ий үеэр тэдний биед тестостерон их хэмжээгээр илэрсний улмаас хүйсийн сорилд тэнцээгүй боловч Олимпын тоглолтод оролцуулсан байна.  

Иман Хелиф нь Олимпын аварга төдийгүй дэлхийн хэмжээний тэмцээнүүдэд амжилттай оролцож байсан туршлагатай боксын тамирчин юм. Түүний шийдвэр нь спортын олон нийтэд болон боксын салбарын дунд өргөн сэтгэгдэл үүсгэж байна.