Сагсан бөмбөгийн “FIBA 3x3 World Cup”  аварга шалгаруулах тэмцээн  “Сүхбаатарын талбай”-д үргэлжилж байна. Дэлхийн аварга шалгаруулах тэмцээний хэсгийн сүүлийн тоглолтууд, хэсгээс гарах эсхээ шийдэх чухал тоглолтууд явагдана. Монгол Улсын эрэгтэйчүүдийн шигшээ баг хэсгийн эхний тоглолтоо  АНУ-ын шигшээ багийн эсрэг хийж 21:18-аар хожигдсон.

Хэсгийн хоёр дахь тоглолтоо, олимп, дэлхийн аварга Лативын багийн эсрэг хийж 21:16-аар хожигдол хүлээсэн билээ.  Өнөөдөр манай баг 18:00 цагаас хэсгийн гурав дахь тоглолтоо Монтенегрогийн багтай, 20:15 цагаас хэсгийн сүүлийн тоглолтоо Японы багтай тус тус хийх хуваарьтай байгаа. Манай багийн бүрэлдэхүүнд Д.Дэлгэрням, Э.Дөлгөөн, А.Ананд, О.Энхбаатар нар тоглож байна. Э.Дөлгөөн маань булчингийн гэмтлээс болж тоглох боломжгүй болсон гэсэн мэдээ байна. Эрэгтэй багт хэсгээс гурваар гарах боломж бий.