Азийн сагсан бөмбөгийн аваргуудын лиг (BCL Asia East)-ийн Зүүн бүсийн урьдчилсан шатны тэмцээний хэсгийн тоглолтууд Монголд болж, өнгөрсөн жилийн аварга “Хасын Хүлэгүүд” болон “Бишрэлт Металл” багууд тоглож байна. 

"BCL Asia East"-ийн хэсгийн шатанд Тайвань, Монгол, Тайланд, Индонез, Малайз, Сингапур зэрэг орны багууд тоглож байна. “М банк арена”-д болж буй тэмцээний “В” хэсэгт Монголын лигийн аварга “Хасын Хүлэгүүд” дөрөв дэх тоглолтоо Тайваний “Кингс”-тай хий, 94:73-аар манай багийн ялалтаар өндөрлөсөн. “Хасын Хүлэгүүд” дөрвөн хожилтойгоор хасагдах шатанд шалгарлаа. Тэд тавдугаар сарын 30-д Индонезийн “Pelita Jaya” багтай тоглохоор болсон байна.

Өчигдрийн тоглолтод “Хүлэгүүд”-ээс Ян Миллер 23 оноо авч багаа тэргүүлсэн бол Жордан Толберт 16, Ч.Ихбаяр 14, Д.Мөнхтүвшин 13, Б.Барсболд 12, А.Азбаяр ес, Жорди Тшиманга тав, О.Сэргэлэн хоёр оноо авчээ. Тэгвэл “В” хэсэгт багтсан “Бишрэлт Металл” баг тав дахь тоглолтоо Тайваний “Таоюань Пайлотс”-ыг өөрийн талбайдаа хүлээн авсан. Энэ тоглолт 85:63 онооны харьцаагаар “Таоюань Пайлотс” багийн ялалтаар өндөрлөжээ. “Бишрэлт Металл” дөрөв дараалан хожигдон 1-4 гэсэн амжилттай хүснэгтэд бичигдэж байна. Тэд маргааш хэсгийн сүүлийн тоглолтоо хагас шигшээд шалгарсан Индонезийн “Pelita Jaya” багтай тоглоно.