Байгаль орчин, уур амьсгалын өөрчлөлтийн яамнаас цөлжилт, уур амьсгалын өөрчлөлттэй тэмцэх үйл ажиллагааг эрчимжүүлэн 2025 оныг “ХӨВ, ЦӨӨРӨМ БАЙГУУЛАХ ЖИЛ” болгон зарлан ажиллаж байна. Тус яам Монголын Үндэсний бөхийн холбоотой “НЭГ СУМ - НЭГ ЦӨӨРӨМ” аяныг хэрэгжүүлэх “ХАМТРАН АЖИЛЛАХ САНАМЖ БИЧИГ”-ийг 2025 оны 02-р сарын 27-ны өдөр байгуулан МҮБХ-г “УСНЫ ЭЛЧ” байгууллагаар зарласан болно. Энэхүү байгаль орчинд нэн тустай мод тарих, ургамал, ан амьтан, хөдөө аж ахуйн салбарт үйл ажиллагаа эрхлэгчдэд ашиг тусаа хүртээх ажилд нийгмийн хариуцлагын хүрээнд МҮБХ анхааран төрийн болон төрийн бус байгууллагууд, аж ахуйн нэгж, иргэдийн усан сан, хиймэл нуур, хөв цөөрөм байгуулах ажлыг олон нийтэд уриалах, сурталчлан таниулах төлөвлөөгөөт ажлын хуваарийг гаргаад байна.

Цаг уурын эрс тэс уур амьсгалтай манай оронд “ХӨВ ЦӨӨРӨМ БАЙГУУЛАХ” ажил нь олон талын ач холбогдолтой бөгөөд үндэсний бөхийн улс, аймаг, сумын цолтой бөхчүүд, жаяг дэгийн багийн гишүүдээс өөрийн төрөлх болон уугуул сумдад “ХӨВ ЦӨӨРӨМ БАЙГУУЛАХ” санал ирүүлэхийг хүсэж байна. Саналыг 2025 оны 04 дүгээр сарын 10-ны өдрийг дуустал МҮБХ-ны [email protected] цахим хаяг болон холбоонд бичгээр хүлээн авч БОУАӨЯам бусад холбогдох мэргэжлийн байгууллагуудад хүргүүлэн тус ажлын судалгааг хийлгэх болно.

Та бүхний санаачилсан хөв, цөөрөм тухайн орон нутагт байгуулах боломжтой бол хамтран ажилласан, ивээн тэтгэсэн иргэн, аж ахуйн нэгж, байгууллагуудын ААНБОАТатвараас 1%-ийг хуулийн дагуу чөлөөлөх ба тухайн бүтээн байгуулсан нуур, хөв, цөөрмийн албан нэршлийг өгөх эрх болон хийсэн ажлыг орон нутгийн иргэд, олон нийтэд хэвлэл, мэдээллийн хэрэгслээр сурталчлан таниулж, амжилттай хэрэгжсэн нуур, цөөрмийн нэршлийг Газар зүйн мэдээллийн санд оруулах болно.