Олон Улсын шатрын холбоо буюу FIDE (International Chess Federation)-аас "FIDE Women's Grand Prix" цуврал тэмцээний 2024-2025 оны улирлын гурав дахь тэмцээн, 80 мянган еврогийн шагналын сантай "FIDE Women's Grand Prix 2025 - Monaco" Монако улсын "Novotel Hotel Monte Carlo"-д боллоо. Энэ удаагийн тэмцээнд 10 шилдэг шатарчин оролцож, гурван тамирчин оноогоор тэнцэн тэргүүн байрыг хуваав. Тэдний нэг нь Монголын IM /Олон улсын мастер/ Б.Мөнгөнтуул байв. Тэрбээр нийт 9 тоглолтын хоёрт хожиж, 7 тэнцэн 5.5 оноо цуглуулж Энэтхэгийн Конеру Хумпи, Оросын Александра Горячкина нарын хамт тэргүүн байрыг эзэллээ. Ингэснээр мастерууд тус бүр 13,833 евро авлаа.