Монголын морин тойруулга ойрын зайн уралдаан уяачдын холбоо ТББ-аас Монгол улсад морин тойруулга, ойрын зайн морин уралдаан, мэргэжлийн морин спортыг хөгжүүлэх зорилгоор Анхны ойрын зайн 1700 м хурдан морины цуврал уралдааныг зохион байгуулна. Тодруулбал, 2025 оны хоёрдугаар сарын 22-ны өдрөөс эхлэн цувралаар 7 хоног бүрийн Бямба, Ням гаригт зохион байгуулах аж. Тус уралдаанд 18 нас хүрсэн жокей морь унаж уралдах юм байна. 

“Жокей” гэдэг нь 16-р зууны үеийн Англид язгууртан ноёдын адууны жүчээнд туслах хийж гүйдэг байсан өсвөр насны эрэгтэй хүүхдүүдийг ингэж нэрлэдэг байжээ. Энэ нь яваандаа хурдан морины уралдаан, үржүүлэгт ямар нэг байдлаар холбоотой хүмүүсийг нэрлэх оноосон нэр болж хувирсан байна. Тэд ямар ч үнээр хамаагүй ялалтад хүрэхийг хүсдэг, саад бэрхшээлийг даван гарах өндөр чадвар, нарийн мэдрэмж зэрэг зүйлсээрээ өөр мэргэжлийн хүмүүсээс ялгагддаг байсан тул удалгүй дээр дурдагдсан зан байдлын онцлогтой бүх хүмүүсийг “жокей” гэж нэрлэх болжээ. Ингэсээр англичууд цэвэр цусны хурдан морины үүлдэр гарган авч уралдаан зохион байгуулдаг болоход морьдыг унаж уралддаг хүмүүс нь гол төлөв “жокей” зан авиртай хүмүүс байсан тул удалгүй хурдан морь унаж уралддаг бүх хүмүүсийг ийнхүү нэрлэдэг болжээ.