ШУТИС болон DX Mongolia-ийн хамтран ажиллах гэрээний хүрээнд сансрын технологи, роботын чиглэлээр Nabar & Nakarai Lab байгуулжээ. Энэхүү ажлын хүрээнд олон янзын судалгаа, бодит ажлууд хийгдэхийн нэг нь Хоньчин Робот төслийн хүрээнд, уралдааны морины унаач Роботыг хийж эхлээд байгаа бөгөөд 2025 оны Наадам-аар Роботоо ашиглан уралдахыг зорьж байлаа. Нийтэд зарлахыг түр хүлээж байсан боловч, цаг үеийн байдалтай холбоотойгоор зарлахаар шийдлээ хэмээн төслийн багийн гишүүн мэдээллээ.

"Бидний зүгээс үндэсний өв соёлоо дээдлэхийг эрхэмлэн үзэхийн зэрэгцээ, хүүхдийн эрхийг ч хамгаалж, мөн орчин цагийн технологитой хөл нийлүүлэн алхахыг зорилгоо болгодог. Тиймээс цаг уурын хүнд нөхцөл гэх мэтээр онцгой нөхцөлд Робот унаачийн хэрэглээг нэвтрүүлэх нь чухал билээ. Өөрөөр хэлбэл өвлийн хүнд нөхцөлд Робот унаачийг түлхүү хэрэглэснээр, өвлийн цагт ч уламжлал болсон хурдан морины уралдааныг бид үргэлжлүүлэх боломжтой болох билээ. Шаардлагатай тохиолдолд бид бүхэн өвлийн уралдаанд 2 төрлийн Робот Унаачаар Уяачдыг хангах боломжтой байгаагаа дуулгахад таатай байна. Хурдан морины уралдаан, уяачдын холбоо, хүүхдийн эрхийг хамгаалах байгууллага болоод технологийн хөгжлийг нэвтрүүлэгчид бид хамтран ажиллах бүрэн боломжтой билээ. Бид хамтдаа хүчтэй." гэв.