Тайпэй хотын "Баорен" цэцэрлэгийн багш нар хүүхдүүдийг ханиадны сиропоор тайвшруулж, унтуулдаг байсан нь илэрчээ. Хүүхдүүдийн сэтгэл хөдлөлийн байдалд өөрчлөлт өгч зарим нь уналт таталт өгч эхэлсэн тул эцэг эхчүүд цэцэрлэгийг шалгуулахаар цагдаад ханджээ. Ингэхэд найман хүүхдээс сэтгэцэд нөлөөт эм болох фенобарбитал, бензодиазепин илэрсэн байна. Эдгээр эмийн тунг хэтрүүлсэн тохиолдолд их хэмжээгээр донтуулдаг хар тамхинаас дутахгүй үйлчилгээтэй аж. 

Фенобарбиталыг эпилепсийн эмчилгээнд ашигладаг бол бензодиапезин нь нойрны эмийн хүчтэй төрөл юм. Зөвхөн жороор олгодог тусгай заалттай тайвшруулах эмийг яагаад хүүхдүүдэд өгсөн нь тодорхойгүй байна. Одоогоор “Баорен” цэцэрлэгийн эрхлэгч болон таван багшийг баривчилж, цэцэрлэгийн үйл ажиллагааг зогсоожээ. 

Цэцэрлэгийн үйл ажиллагааг удирддаг толгой компани болох Jidibao Education Group уучлал гуйсан мэдэгдэл хийсэн ч "үнэн хараахан тодорхой болоогүй байна" хэмээн тодорхой мэдээлэл өгөхөөс булзаж байна хэмээн эцэг эхчүүд буруутгаж байгаа юм. Түүнчлэн дөрөв, тавдугаар сард эхний хүүхдүүдэд шинэ тэмдэг илэрч гомдол гаргахад хүлээж авалгүй мөрдөн шалгалтыг удаашруулсан асуудалд цагдаагийн байгууллага ч холбогдож буй.

Ням гарагт Тайбэй хотын захиргааны гадаа хэдэн зуун хүн жагсаал хийж, хотын дарга Хоу Ю-И-г сургуулийн өмнөх боловсролын байгууллагатай холбоотой дуулианд хойрго хандсан хэмээн буруутгалаа. Одоогоор Тайбэй хотын эмнэлгүүд сургуулийн өмнөх насны бүх хүүхдийг үнэ төлбөргүй цусны шинжилгээнд хамруулж байна.